ने. सं. ११४४ ञलाथ्व दशमी -

कोरोनाया कारणं ठमेल सुनसान

व्यवसाय ठप्प जुयाः पर्यटन व्यवसायी चिन्तित

येँ – चीनय् ब्वलंगु कोराना भाइरसया कारणं आः राजधानी येँ देय्या पर्यटन व्यवसाय समेत प्रभावित जूगु दु। थुकिं यानाः थौंकन्हय् ठमेल समेत सुनसान खने दयाच्वंगु दु । थौंकन्हय् चिनियाँ न्हूदँ हनाच्वंगु दु। न्हापा जूसा थ्व इलय् ठमेलय् चिनियाँ पर्यटकत म्वः म्वः खने दइगु खःसा थुगुसि सुनसान जुयाच्वंगु खँ पर्यटन व्यवसायी कुमार खड्गीं कनादीगु दु । वय्कलं कनादी कथं कोरोना भाइरसया कारणं पर्यटक मवयेवं पसः हे सुनसान जूगु दु। वंगु दँय् चिनियाँ पर्यटक वयेगु क्रम अप्वया वनाच्वंगु खःसां भाइरसया कारणं थुगुसी चिनियाँ जक मखु युरोपेली पर्यटक तकं वयेगु म्हो जूगु दु ।

पर्यटक सुनसान जुयाः ठमेलया रेष्टुरेन्ट व्यवसायीतय्सं आः व्यवसाय हे बन्द यायेमाःगु अवस्था वःगु खँ धाःगु दु। छम्ह रेष्टुरेन्ट व्यवसायीया कथं थौंकन्हय् पर्यटक वयेगु सिजन सुरु जुइमाःगु खँसां कोरोनाया कारणं नेपालय् पर्यटक वयेत ग्यानाच्वंगुलिं व्यवसाय हे धरापय् लानाच्वंगु दु ।

‘पर्यटक हे मवःसा लाखौं तका बाः गुकथं पुलेगु, कर्मचारीयात तलब गय् यानाः बीगु?’ वय्कलं धयादी । थ्व सिजन स्यन धाःसा पर्यटन व्यवसायीतय्सं मेगु स्वला तक बाः तकं साले मफइगु अवस्था वयेफइगु खँ धाःगु दु। न्हापा २०५८ सालय् माओवादी आन्दोलन तच्वयेवं पर्यटन व्यवसायीत पलायन जूगु खँ न्ह्यथँसें व्यवसायीतय्सं आः नं अज्याःगु अवस्था ब्वलनेफूगु खँ धाःगु दु ।

विश्व स्वास्थ्य संगठनं चीनय् ब्वलंगु कोरोना भाइरसया लिच्वः नेपालय् लायेफइगु धासें जारी याःगु विज्ञप्तिं नेपाःया पर्यटन व्यवसाय प्रभावित जूगु खँ सम्बन्धित व्यापारीतय्सं धाःगु दु। स्वास्थ्य संगठनया ख्याच्वःयात नेपाः सरकारं प्रतिकार मयाःगु जक मखुसें चीनय् लानाच्वंपिं नेपाःमियात उद्धार यायेगु ज्याय् तकं सरकारं यानाच्वंगु आनाकानी यानाच्वंगुलिं पर्यटकतय्त अःखः लिच्वः लानाच्वंगु दु ।

थुगुसी नेपालं भ्रमण वर्ष घोषणा यासें २० लाख पर्यटक दुकायेगु लक्ष्य तयातःगु खः । उकी मध्ये ५ लाख चीनं वइगु अनुमान जुयाच्वंगु खः । तर आः थ्व लक्ष्य पूवंके मफइगु निश्चित जूगु खँ धयाहःगु दु

चीनय् नेपाःया विमान पियाच्वन
चीनया कोरोना प्रभावित नगर वुहानय् थानाच्वंपिं १८५ म्ह नेपाःमितय्त नेपाः हयेत अझ छुं न्हि काइगु खँ धाःगु दु। उमित थन हयेगु लागिं आः तक नं माःगु व्यवस्था याये मफुगु कारणं नेपाः हयेत अझ ई कायेत्यंगु खः । उखे चीनय् धाःसा नेपाःया राजदूतावासं नेपाःमितय्त लित छ्वया हयेगु लागिं सम्पूर्ण तयारी पूरा यायेधुंकूगु खँ धाःगु दु। उपिं आः नेपालं विमान छ्वया हइ धकाः पियाच्वंगु दु। थुखे नेपालय् म्हिगः नं उमि अभिभावकतय्सं स्वास्थ्य मन्त्रालयय् वनाः धर्ना बीगु ज्या याःगु दु ।