सिक्किमया अमूर्त सांस्कृतिक सम्पदा संरक्षणया अध्ययन

येँ – येँया इन्द्रजात्रा व्यवस्थापन समितिं सिक्किमया अमूर्त सांस्कृतिक सम्पदा संरक्षणया अध्ययन भ्रमण याःगु दु । समिति अध्यक्ष गौतमरत्न शाक्यया नेतृत्वय् नीखुम्हेसिया छगू पुचः आः नकतिनि सिक्किमय् उगु अध्ययन भ्रमण यानाः लिहां वःगु दु । अध्ययन भ्रमणया झ्वलय् उखेपाखे वःगु समितिं सिक्किमय् च्वंपिं नेवाःतय् संगठन सिक्किम नेवाः गुथियात हनेज्या नं याःगु खः । गुथिया न्वकु हरिप्रसाद प्रधानया सभापतित्वय् जूगु ज्याझ्वलय् मू पाहां विक्रम प्रधानं त्वाःदेवाय् मत च्याकाः ज्याझ्वःया उलेज्या यानादीगु खः । सिक्किम नेवाः गुथिया मूछ्यांजे मय्जु अनिता प्रधानं मूपाहां, विशेष पाहां, पाहांपिं सकसितं खादां न्ययेकाः, ब्याच लःल्हानाः लसकुस यानादीगु खः । इन्द्रजात्रा व्यवस्थापन समितिया मूछ्यांजे बाबुराजा महर्जनं ब्वनाः न्यंकादीगु हनापौ समितिया नायः गौतमरत्न शाक्यं गुथिया न्वकु प्रधानयात लःल्हानादीगु खः । अथे हे समितिया वरिष्ठ न्वकु शरदकुमार डंगोलं मूपाहां, विशेष पाहां, पाहांलिसें गुथिया पदाधिकारीपिंत खादां न्ययेकाः हनेज्या यानादीगु खःसा समितिया नायः शाक्यं मतिनाया चिं लःल्हानादीगु खः ।

ज्याझ्वलय् येँ महानगरपालिकाया प्रमुख विद्यासुन्दर शाक्यया भिंतुना सन्देश येँ महानगरपालिका १८ वडाअध्यक्ष न्हुछेकाजी महर्जनं ब्वनाः न्यंकादिसें उगु भिंतुना पौ गुथिया न्वकुलिसें ज्याझ्वःया सभापतियात लःल्हानादीगु खः ।अथे हे समितिया वरिष्ठ उपाध्यक्ष डंगोलं बखतवीर डंगोलया पुस्तेवारी व निध्वः नांगु सपूm गुथियात लःल्हानादीगु खः । ज्याझ्वःया मूपाहां विक्रम प्रधानं गुथिया व समितिया हनाज्याझ्वलय् ब्वति काये खंगुलिं थः तसकं लय्ताःगु धासें थुगु दिं थःगु निंतिं ऐतिहासिक जूगु विचाः तयादीगु खः । अथे हे विशेष पाहांकथं झायादीपिं सिक्किमया अति विशिष्ट व्यक्तित्व सूर्यवीरसिंह तुलाधर, अखिल भारतीय नेवार संगठन कालिम्पोङया मूछ्यांजे योगवीर शाक्य, समितिया नायः गौतमरत्न शाक्यंपिंसं थःथःगु नुगःखँ तयादीगु खः । ज्याझ्वलय् विधायक श्याम प्रधान, सूर्यवीर सिंह तुलाधर, योगवीर शाक्य, येँ मनपा १८ वडाअध्यक्ष न्हुछेकाजी महर्जन, येँ महानगरपालिका हनुमानध्वाखा दरवार संरक्षण कार्यक्रमया प्रमुख उदयबहादुर पसखलः विशेष पाहाकथं आसन ग्रहण यानादीगु खः ।थ्व हे झ्वलय् सिक्किम नेवाः गुथिया भवन निर्माणया निंतिं सिक्किम राज्य सरकारपाखें स्वंगू करोड न्यय्गू लाख भारु अनुदानकथं बीगु जूगु दु । लुमंकेबहजू, सिक्किम राज्य सरकारं येँयाःकुन्हु सिक्किमय् सार्वजनिक व नेपालभाषायात सरकारी मान्तया नं बियातःगु दुसा दछियंकंया जात्रापर्व हनेगु निंतिं नं गुथियात दँय्दसं न्यय्गू लाख अनुदान बिया वयाच्वंगु दु ।