आइएलओ १६९ व युएनड्रिप नेपालभाषां पिदन

येँ – स्वनिगःया आदिवासी नेवाःतय्सं थःपिनिगु हक अधिकारया नितिं अन्तर्राष्ट्रिय कानुन नापं नेपाल पक्ष राष्ट्र जुयाच्वंगु महासन्धीया आधारय् हे न्ह्याः वनेमाः धायेगु यानाच्वंगु दु । गैर न्यायीक सडक विस्तारया सवालंनिसें नेवाःतय्गु संस्कृति, सम्पदा, भाषानिसें फुक्क पक्षयात सम्वोधन याकेगु नितिं धकाः आधार कायेगु ज्या नेवाःतय्सं आदिवासी जनजाति सम्वन्धी अन्तर्राष्ट्रिय श्रम संगठन महासन्धी नं. १६९ अर्थात आइएलओ १६९ कायेगु यानाच्वंगु दु । अथेहे आदिवासी जनजातिया अधिकार सम्वन्धी संयुक्त राष्ट्रसंघीय घोषणा पौ अर्थात युएनड्रिप खः । आः थ्व निगुलिं महासन्धी नेवाःभासं उल्था यानाः पिदंगु दु ।

इण्डिजिनियस मिडिया फाउन्डेसनपाखें थ्व निगुलिं महासन्धी थीथी नीनिगू भासं अनुवाद याना सफूया रुपय् पिथंगु खः । उकी पत्रकार श्रीकृष्ण महर्जनं नेपालभाषां भाय् हिलाः नेवाःभासं सफुतिइ दुथ्याकादीगु खः ।

वंगु दँय् लकडाउनया ईयात सदुपयोग याना थःम्हं नेवाः भासं हिलागु व थुगुसी लकडाउनया इलय् सफूया रुपंय् पिदगु खँ वय्कलं कनादीगु दु । ब्वने अःपुकेगु नितिं इ–सफूया रुपय् पिडिएफ भर्सनय् नं व्यवस्था जूगु दु धयादिसें पत्रकार महर्जनं नेवाःतय्सं आःया निषेधाज्ञाया ईया सदुपयोग याना ब्वनादीत नं इनाप यानादीगु दु ।

थुगु सफुतिइ सुनवार, वान्तावा,चाम्लिङ , चेपांङ, छन्त्याल, दनुवार, धिमाल, गुरुङ, ह्यल्मो, जिरेल, कुलुङ, लिम्बु, मगर, माझी, नेपालभाषा, शेर्पा, तामाङ, थामी, थारु, उराँव, नेपाली अंग्रेजि भासं आइएलओ १६९ व युएनड्रिपयात दुथ्याकातःगु दु ।

आदिवासी जनजातिया अधिकार सम्वन्धी संयुक्त राष्ट्रसंघीय घोषणा पत्र (युएनड्रिप) संयुक्त राष्ट्रसंघया महासभां सन २००७ सम्पटेम्बर १३ या दिनय् अनुमोदन याःगु आदिवासी जनजाति अधिकार सम्वन्धी महत्वपूर्णगु अन्तर्राष्ट्रिय कानुन खः । थ्व घोषणापत्रयात संयुक्त राष्ट्रसंघया फुक्क सदस्य राष्ट्र थुकिया पक्षय् ल्हाःचिं तयेधुंकूगु दु ।

अथे हे आदिवासी जनजाति अधिकार सम्वन्धी महत्वपुर्णयगु अन्तर्राष्ट्रिय कानु्न अर्थात आदिवासी जनजाति मानव अधिकार सम्वन्धी अन्तर्राष्ट्रिय महासन्धि खः । थुकीयात आदिवासी जनजाति सम्वन्धी अन्तर्राष्ट्रिय श्रम संगठनया महासन्धी नं. १६९ धाइ ।

थ्व महासन्धीयात नेपालं तत्कालिन अन्तरिम व्यवस्थापिका संसदपाखें २०६४ भाद्र ५ गते पारित यानाः २०६६ साल भदौ
२९ गते अन्तर्राष्ट्रिय श्रम संगठनया जेनेभाया मुख्यालयय् विधिवत दर्ता याना औपचारिक रुपं अनुमोदन याःगु खः । थ्व महासन्धी अनुुमोदन याःगु दक्षिण एसियाली देय्त मध्ये न्हापांगु देय् नेपाः खः ।

सम्बन्धित बुखँ

LEAVE YOUR COMMENTS