नेवाः एनआरएनतय् नेपाः सम्मेलन

येँ – येँय् जुयाच्वंगु गैर आवासीय नेपाःमितय् तःमुँज्याय् ब्वति काः वयेत नेपाः वयाच्वंपिं उम्मेदवारतय्त लसकुस यायेगु ताः तयाः ग्लोबल नेवाः नेटवर्कपाखें म्हिगः थन छगू ज्याझ्वः यात । नेवाः एकता अभियानया ग्वसालय् ‘ग्लोबल नेवाः कन्फरेन्स’ धइगु नां तयाः उगु ज्याझ्वः याःगु खः । ज्याझ्वः नेवाः एकता अभियानया नायः सुनिलकुमार शाक्यया सभापतित्वय् जूगु खः ।

विश्वन्यंकं च्वंपिं नेवाःतय्सं नेपालय् च्वंपिं नेवाःतय् लागिं छु याये फइगु खँयात कयाः नायः शाक्यं छगू अवधारणा नं न्ह्यब्वयादीगु खःसा उकियात कयाः थीथी वक्तातय्सं थःपिनि बिचाः तयादीगु खः । ज्याझ्वलय् येँय् जुइगु एनआरएन तःमुँज्याय् उम्मेदवार जुयाच्वंपिंसं नं नुगःखँ तयादीगु खः ।

उगु हे ज्याझ्वलय् ग्लोबल नेवाः नेटवर्क व नेवाः एचडी टिभीया मंकाः ग्वसालय् जूगु मचा कविता वाचन धेंधेंबल्लाः कासाय् त्याःपिनि नां घोषणाया लिसें सिरपाः इनेगु ज्या नं जूगु खः । जनकवि दुर्गालाल श्रेष्ठ मू पाहां जुयाः न्ह्याःगु उगु ज्याझ्वलय् कविता धेंधेंबल्लाः कासाया निर्णायक मण्डलया कजि भूषणप्रसाद श्रेष्ठं विजयी मस्तय् नां घोषणा यानादीगु खः ।

नेपाः लगायत विश्वया थीथी देशय् च्वंपिं मस्तय्सं कविता यानाः रेकर्ड यानातःगु भिडियो छ्वया हयेगु व उकिया हे लिधंसाय् उगु धेंधेंबल्लाः याःगु खः । कासाय् ७० म्ह स्वयां अप्वः मस्तय्सं ब्वति काःगु खः ।

नेपालभाषा टाइम्स

च्वमिया मेमेगु

• थुकथं न्ह्यात बोडेया म्ये प्वाः खनीगु जात्रा
• बिस्काःया झ्वलय् थिमिइ ‘सुथसिया याः’ न्यायेकल
• छायादेवीया जग्गा पुखू प्रमाणित
• पाहाँचःह्रे क्वचाल
• ताेखाय् बिस्काःया निंतिं यःसिं थन