कोरोनामुक्त जुयाः टेकु अस्पतालं ४म्ह डिस्चार्ज

येँ – येँया टेकुइ च्वंगु शुक्रराज ट्रपिकल तथा सरुवारोग अस्पतालय् वासः याकाच्वंपिं ४म्ह मनूत कोरोना मुक्त जुया डिस्चार्ज जूगु दु । वंगु २४ घण्टाया दुने याःगु निगू परीक्षणया लिच्वः नेगेटिभ वःगुलिं उमित डिस्चार्ज याःगु खः ।

स्वास्थ्य तथा जनसंख्या मन्त्रालयया प्रवक्ता डा. विकास देवकोटां बिहीवाः ४म्ह डिस्चार्ज जूगु धयादिल । डिस्चार्ज जूपिं २म्ह येँय् व २म्ह ख्वपय् च्वनाच्वंपिं खः । डिस्चार्ज जूपिं मध्ये छम्ह ख्वपया दुवाकोटय् च्वनाच्वम्ह सशस्त्र प्रहरी खः । अथेहे मेम्ह मध्यपुर थिमिया शंखधरचोक नापं च्वनाच्वम्ह अरोग्य अस्पतालया कर्मचारी खः । मेम्ह येँया चन्द्रागिरी नरपालिकाया मच्छेगाँमय् च्वीम्ह खः । उम्ह मिसा वैशाख ३० गते कञ्चनपुरय् येँ वःगु खः ।

नेपालय् कोरोना भाइरस मुक्त जुयाः अस्पतालं डिस्चार्ज जूपिनि ल्याः ४९म्ह थ्यंगु दु ।