बालगोपालेश्वर देगः दनेगु म्याद नं क्वचाल

येँ- येँ महानगरपालिकां दयेकूगु लानिपुखूया दथुइ च्वंगु बालगोपालेश्वर देगः मिले मजू धकाः थम्हं हे दयेकेगु जिम्मा काःगु पुरातत्व विभाग नं देगः दनेगु ज्याय् असफल जूगु दु । मनपां अन कंक्रिट प्रयोग यात धकाः विरोध यासें थम्हं हे उगु देगः दनेगु धकाः पुरातत्व विभागं जिम्मा काःगु खःसा आः तक विभागं देगः दनेगु लागिं ठेकेदारलिसे निक्वः तक सम्झौता याःसां ज्या धाःसा न्ह्याके फयाच्वंगु मदुनि ।

ठेकेदारलिसे याःगु निक्वः तक याःगु सम्झौताया म्याद गुजे्र जुइधुंकल तर विभागं न ज्या न्ह्याकेत ताकेता याये फत न ज्या मयाःम्ह ठेकेदारयात हे कारवाही याये फत ।

पुरातत्व विभागं कँडेल÷राम जेभी ठेकेदार कम्पनीलिसे वंगु असार मसान्त तकया दुने ज्या हे सिधयेकेगु धकाः सम्झौता याःगु खः । तर असार सिधयाः आः साउन हे सिधयेत्यनं नं ज्या क्वचाइगु ला त्वःता हे छ्वये, सुरु तकं बांलाक जूगु मदुनि ।

पुरातत्व विभागं थ्व स्वयां न्ह्यः याःगु छगू सम्झौता दथुइ हे क्वचाःगु खःसा आः निक्वःखुसी याःगु सम्झौता नं ज्या सिमधःनिगु क्वचाःगु दु ।

देय्या पुरातात्विक महत्वया सम्पदा दयेकेगु जिम्मा थःगु खः धासें विभागं लानिपुखूया बालगोपालेश्वर देगः थःपिंसं दयेकेगु जिम्मा काःगु खः । लुमंकेबहः जू, २०७२ सालया माघ २ गते उगु देगः दछिया दुने दयेके सिधयेकेगु ताः तयाः राष्ट्रपति विद्यादेवी भण्डारीं शिलान्यास यानादीगु खः । थ्व देगः न्हापा प्रताप मल्लं दयेकातःगु शैलीं दयेकेमाः धकाः स्थानीय जनता व विज्ञ पुचलं सुझाव बिउगु खःसां पुरातत्व विभागं उकियात वेवास्ता यासें जंगबहादुरकालीन शैलीं दयेकेत्यंगु खः ।

सम्बन्धित बुखँ

LEAVE YOUR COMMENTS