‘अत्यावश्यक ज्याय् स्वनिगलय् दुहां वयेमाःसा कोरोना मदुगु पुष्टि यानाः जक वयेमाः’

येँ – येँ महानगरपालिकां स्वनिगलय् दुहां वइपिंसं प्रस्थान विन्दुइ हे कोराना मदुगु पुष्टि यायेमाःगु खँ धाःगु दु । येँ महानगरपालिकाया नगरपरिषद्या ४६ क्वःगु विशेष बैठक च्वसें अत्यावश्यक जुयाः स्वनिगलय् दुहां वयेमाःसा प्रस्थान बिन्दूइ हे स्वास्थ्य परिक्षण यानाः कोरोना भाइरस मदुगु पुष्टि याये धुंकाः जक स्वनिगलय् दुहां वयेगु व्यवस्था मिले यायेत गृह मन्त्रालययात इनाप यायेगु निर्णय याःगु खः ।

महानगरपालिकां बैठकया निर्णय सार्वजनिक यासें आः नं अत्यावश्यक सेवाया सामान हइगु गाडी व पासया दुरुपयोग यानाः स्वनिगलय् मनूत दुहां वयाच्वंगु धासें लकडाउन अवधि जःछि स्वनिगलय् दुहां वइगु फुक्क नाका सिल यायेगु निंतिं नेपाल सरकार, गृह मन्त्रालय व जिल्ला प्रशासन कार्यालययात इनाप यानाः पौ छ्वयेगु खँ नं धाःगु दु ।

अथेहे लकडाउनया उल्लंघन यानाः अनुमति हे मकासे सुलाःसुलाः स्वनिगलय् दुहां वल धाःसा दुहां वःम्ह मनू व वयात ग्वाहालि याःम्हेसित तकं उच्च निगरानीइ तयाः कानून कथं कारवाही यायेत नं गृह मन्त्रालययात इनाप यानागु खँ महानगरया प्रवक्ता ईश्वरमान डंगोलं पिथनादीगु वक्तव्यय् न्ह्यथनातःगु दु ।

अथेहे महानगरपालिकाया क्षेत्र दुने आवश्यक ल्याखय् क्वारेन्टाइन संचालन यायेत, व्यवस्थापन यायेत व आवश्यक कथं सःशुल्क क्वारेन्टाइन संचालन यायेगु व्यवस्था मिले यायेत नं जिल्ला प्रशासन कार्यालय येँयात इनाप यायेगु खँ धाःगु दु । येँ मनपां सार्वजनिक सेवाय् ज्या यानाच्वंपिं जनप्रतिनिधि, कर्मचारी, स्वास्थ्यकर्मी, सञ्चारकर्मी, सुरक्षाकर्मी व स्वयमसेवकतय्त नं निःशुल्क व सर्वसाधारणयात निःशुल्क अथवा सःशुल्क कोरोना भाइरस सम्बन्धी परीक्षण यायेगु ज्या नं तुरुन्त व्यवस्था यायेत नेपाल सरकारयात इनाप याःगु दु ।

नेपालभाषा टाइम्स

च्वमिया मेमेगु

• थुकथं न्ह्यात बोडेया म्ये प्वाः खनीगु जात्रा
• बिस्काःया झ्वलय् थिमिइ ‘सुथसिया याः’ न्यायेकल
• छायादेवीया जग्गा पुखू प्रमाणित
• पाहाँचःह्रे क्वचाल
• ताेखाय् बिस्काःया निंतिं यःसिं थन