ने. सं. ११४४ कौलाथ्व पारू - नःलास्वनेगु

बर्डफ्लुपाखें न्हापांखुसी मनू सित

येँ – नेपालय् न्हापांखुसी बर्ड फ्लु ल्वचं कयाः मनू सीगु दु । बर्ड फ्लु जुयाः मनू सीगु नेपाःया थ्वहे न्हापांगु घटना खः । काभ्रेया २१ दँ दुम्ह ल्याय्म्ह बर्ड फ्लु संक्रमण जुयाः मदुगु खँ स्वास्थ्य मन्त्रालयं धाःगु दु । स्वास्थ्य मन्त्रालयं म्हिगः पत्रकार सम्मेलन यानाः थ्व जानकारी बिउगु खः । मन्त्रालयं सीम्हेसिया म्हसीका गोप्य तयातःगु दु । ज्वर, सेखं, मुसु वयाः म्हं मफुम्ह उम्ह ल्याय्म्हयात चैत १० गते अस्पताल भर्ना याःगु खः । कन्हय् कुन्हु ला परीक्षणया निंतिं राष्ट्रिय जनस्वास्थ्य प्रयोगशाला टेकुइ छ्वया बिल । वकुन्हु हे उम्ह ल्याय्म्हयात इन्फ्लुयन्जा विरुद्धया वासः नं बिल । तर, चैत १५ गते वासः याकुयाकुं मंत ।

राष्ट्रिय जनस्वास्थ्य प्रयोगशालाय् याःगु परीक्षणं वयात जूगु भाइरस गज्याःगु खः धकाः सीके मफयेवं विश्व स्वास्थ्य संगठन जापानस्थित प्रयोगशालाय् लाया नमूना छ्वःगु खः । वैशाख १७ गते वःगु लिच्वः कथं इन्फ्लुएन्जा ‘ए एच फाइभ ए वान’ संक्रमण जूगु लुइकूगु खँ मन्त्रालयं धाःगु दु । मन्त्रालयया कथं ए एच फाइभ ए वानपाखें मनूयात संक्रमित जूगु नेपालय् थ्व न्हापांगु घटना खः ।

मन्त्रालयया कथं मेपिं विरामीतय्के धाःसा ‘एच फाइभ एन वान’ संक्रमण खनेमदुुनि । थ्व भाइरस पंक्षीपाखे संक्रमण जुइ व गबलें गबलें पंक्षीपाखे मनूयात नं सरे जुइ । थुगु भाइरस न्हापांखुसी सन् १९९६ स पत्ता लगे जूगु खः । विश्व स्वास्थ्य संगठनया कथं सन् २००३ निसें आः तक हलिंन्यंकं ८६० म्हेसित एच फाइभ एन वान भाइरसया संक्रमण जुइधुंकूगु दु । उकी मध्ये बछि मनू सीगु दु । तर आः तक एच फाइभ एन वान भाइरस मनूपाखें मनूयात सरे जूगु मदुनि ।