तेस्रोलिंगी यौन व्यवसायी पूर्ण रुपं नियन्त्रित

येँ – येँया लाजिम्पाट, लैनचौर लागाय् ग्राहक मालेत बहनी झ्वःझ्वः च्वंच्वनीपिं तेस्रोलिंगी यौन व्यवसायीत थौंकन्हय् उगु लागाय् उलि खने मदु । छगू इलय् थुपिं अन दनाः पूरा लागायात हे बैंककया छकू कुचा थें खने दयेका जुइपिं खः ।
थुपिं न्हापा ठमेलया मूख्य केन्द्रय् हे ग्राहक माः जुइपिं खः । प्रहरीं उमित अनं चीकेवं थुपिं लैनचौरपाखे मुं वन । लिपा अनं नं चीकेवं लाजिम्पाटपाखे च्वं वन । उकिं केवल ख्याना जक छ्वयां थुमित नियन्त्रण याये फइ मखुत धासें वडा नं. २ व ३ मिले जुयाः थुपिं बालं च्वनीगु थासय् हे वनाः थना छ्वयेगु ज्या याःगु खः । लिसें थज्याःपिं तेस्रोलिंगी यौन व्यवसायीतय्त सुनां नं बालं तये मते धकाः आह्वान यानाःलि तिनि थुपिं अन मदया वंगु खँ वडा नं. २ या वडाध्यक्ष राजेन्द्रकुमार श्रेष्ठं कनादिल ।

वय्कलं कनादी कथं थुमित प्रहरी हयाः ज्वंके नं मजिउ । ज्वन कि हे कन्हय् कुन्हु ब्लु डायमन्ड सोसाइटीय पदाधिकारीत वयाः त्वःतका यंकी । उकिं उमित बालं च्वनीगु थासं हे थना छ्वत कि तिनि चीके फइ धइगु बिचाः यानाः थना छ्वःगु खः ।

वडाअध्यक्ष श्रेष्ठया कथं थुमित थना छ्वयेत नं थाकुल । छाय्धाःसां थुपिं ग्राहक मालेत २ नम्बर वडाय् लाःगु लाजिम्पाटय् दं वइगु खःसां बालं च्वनीगु छेँ धाःसा फुक्क हे ३ नम्बर वडाय् लाः । उकिं ३ नम्बर वडाया समेत ग्वाहालि कयाः छेँथुवाःयात सम्झे यानाः थना छ्वये फुगु खः । थुपिं २ नम्बर वडाय् लाःगु सतकय् वयाः ग्राहक माली । अले ग्राहक लुइवं वहे ३ नम्बर वडाय् लाःगु डेरापाखे वनी ।

थुपिं न्हापा थ्व लागाय् छक्वलं हे ४०–४५ म्ह तक दं वइगु खः । थुमिसं यानाः अन तसकं हल्ला जुइगु, ल्वापु जुयाच्वनीगु व लिबाक लँय् जुइपिं नं असुरक्षित जुया वःगु खः । थ्व यौन व्यवसायीत ३ नम्बर वडाया गल्लि गल्लिइ लाःगु आपालं छेँय् बालं च्वनाच्वंगु खः । छगू थासय् ला थुपिं लाइन हे दुगु १३ गू टहरा बालं कयाः च्वनाच्वंगु खः । छगू हे टहरा २०–२५ म्ह तेस्रोलिंगी यौन व्यवसायीत च्वनीगु खःसा थुमिसं यानाः अन तसकं हल्ला नं जुइगु खः । लिपा प्रहरी हे यंकाः अनं चीका छ्वयेवं स्थानीय जनतां नं शान्तिया सासः ल्हाःगु खँ वडाध्यक्ष श्रेष्ठं कनादिल ।

थ्व तेस्रोलिंगी यौन व्यवसायीत न्हिनय् गुप्तवास जुयाच्वनीगु खःसां बहनी ९–१० बजे जुइवं अतिकं बांलाक समाः यानाः ग्राहक माः वइगु खःसा थुमित नं अज्याःपिं हे ग्राहकतय्सं यंकीगु खः ।