नेवाः डेक्स व कर्मचारी दुसां निवेदन मवः
यल -यल महानगरपालिकाया प्रमुख चिरिबाबु महर्जनं महानगरपालिकाय् नेपालभाषा नापं मेमेगु भासं नं निवेदन कायेगु निंतिं व्यवस्था यानागु खःसां खस् भासं बाहेक मेगु भासं निवेदन दुहां मवःगु धयादीगु दु । महानगर प्रमुख महर्जनं नेवाः भासं निवेदन कायेगु निंतिं नेवाः डेक्स स्थापना यानाः कर्मचारी हे व्यवस्था याना तयागु खःसां खस् भाषा बाहेकं मेगु भासं निवेदन हे दुहां मवः धयादिल । छुं ई न्ह्यव यल महानगरपालिकाया नगर परिषदय् खस् भाय् ल्हाइपिं कर्मचारीतय्सं नेपालभाषाया कारणं थःपिंत ज्या यायेत मछिन धइगु सः थ्वयेकेवं छझाः नेपालभाषा हे लिकया बिउगु धइगु खँ चर्चाय् वःगु खः ।
लिपा स्थानीय भाषिक कार्यकर्ता व संघसंस्था जानाः उकिया विरोध यायेवं नेपालभाषा डेक्स हे स्थापना यायेगु नापं आवश्यक कर्मचारीया नं व्यवस्था यानाः निवेदन दुकायेगु ज्या शुरु याःगु खः । थथे नेपालभाषाया निंतिं बिस्कं डेक्स स्थापना व कर्मचारीया व्यवस्था यानाः नेवाः भासं नं निवदेन कायेगु स्वीकृत जुइ धुंकाः नं नेपालभाषाया खलः, पुचः व व्यक्तिगत रुपं नेपालभाषां धाःसा निवेदन तयेगु ज्या जुयामच्वंगु प्रमुख महर्जनं धयादीगु दु ।
नेपालभाषायात नं कामकाजी भाय् यायेगु धकाः थःपिं निर्वाचित जुया वये धुंकाः महानगरपालिकाया न्हापांगु बोर्ड बैठकं हे पारित यानागु व बोर्डया निर्णय कथं हे आवश्यक व्यवस्था यानागु गुला दये धुंकाः आतक नं महानगरपालिकाय् छगू हे निवदेन दर्ता जू मवःगु खँ न्ह्यथँसें वय्कलं नेवाः समुदाययात उकथं निवेदन दर्ता यायेगु ज्याय् सक्रियता क्यनादीत इनाप यानादिल ।प्रमुख महर्जनय् ख्वनाय् जूगु छगू ज्याझ्वलय् नवायेगु झ्वलय् उगु खँ धयादीगु खः ।
LEAVE YOUR COMMENTS