एटीएम अपराध ३५ प्रतिशत

येँ – वंगु छुं ई थुखेंनिसें प्रविधिया कारणं यानाः नेपालय् बैंकिंग अपराध अप्वया वःगु खँ नेपाल प्रहरीया अनुसन्धान विभाग सीबीआईं धाःगु दु । बैंकतय्गु सञ्चालन विधिया कमजोरी व प्रविधिया लबः कयाः अज्याःगु अपराध अप्वयाच्वंगु खः । उकी मध्ये नं एटीएम कार्ड मार्फत जुइगु बैंकिक अपराधया ल्याः दकलय् अप्वः दु ।

सीबीआईया कथं नेपालय् जुइगु सम्पूर्ण बैंकिंग अपराध मध्ये एटीएम कार्ड मार्फत जुइगु अपराधया ल्याः ३५ प्रतिशत दु । एटीएम कार्डया पास वर्ड दुरुपयोग, ह्याकिंग आदि थेंज्याःगु माध्यमं अज्याःगु अपराध जुयाच्वंगु खः । वंगु स्वदँया दुने जूगु ३० गू ततःधंगु बैंकिंग अपराधय् एटीएम कार्ड मार्फत जूगु अपराधया ल्याः १० गू दु ।

वंगु न्यादँया दुने एटीएम कार्ड मार्फत जूगु बैंकिंग अपराधपाखें जक करिब १६ करोड दां नोक्सान जूगु खँ नं सीबीआईं धाःगु दु । प्रविधिया दुरुपयोग यानाः जुइगु अप्वः धइथें बैंकिंग अपराधय् बैंकया कर्मचारी समेत संलग्न जुयाच्वंगु नं लूगु दु ।