सुलाः सुलाः स्वनिगलय् दुहां वइपिंत कारवाही यायेत मेयरपिनि माग

येँ – स्वनिगःया मेयरपिंसं गृहमन्त्री रामबहादुर थापायात स्वनिगलय् दुहां वइगु फुक्कं नाका सिल यायेत माग याःगु दु । थौं मन्त्रालयय् गृहमन्त्रीया हे अध्यक्षताय् जूगु बैठकय् उपत्यका नगरपालिका फोरमया पदाधिकारीपिंसं स्वनिगलय् दुहां वइगु फुक्कं नाकाय् कडाइ यायेत माग याःगु खः ।

स्वनिगःया मेयरपिं लिसें गृहसचिव, स्वंगुलिं जिल्लाया प्रमुख जिल्ला अधिकारी व सुरक्षा प्रमुखपिं सहित जूगु बैठकय् थःपिंसं नाका सिल यायेत, सुलाः सुलाः स्वनिगः दुहां वइपिंत कारवाहीया दायरया हयेत माग यानागु खँ फोरमया अध्यक्ष व येँ महानगरपालिकाया मेयर विद्या सुन्दर शाक्यं कनादीगु दु ।

‘उपत्यका नगरपालिका फोरमं बियागु सुझावयात पूवंक पालना यायेत गृहमन्त्रीयात इनाप यानागु दु’ वय्कलं धयादिल, ‘लखौं स्वनिगःवासीपिंसं सरकारं याःगु लकडाउनया निर्णय पालना यानाच्वंगु अवस्थाय् छुं छुं मनूत पिने दुहां वयेगु याःगुलिं स्वनिगः हे अशान्त जुयाच्वंगु दु । उकिं गृहमन्त्रीयात नापलानाः नाकाय् कडाइ यायेगु जक मखु, प्रस्थान विन्दुइ हे वये–वने यायेगु पनेगु ज्या कडा पूर्वक नालेगु व्यवस्था यायेत इनाप यानागु दु ।’

वय्‌कलं स्वनिगलय् दुहां वयेत स्वःपिंत प्रस्थान विन्दुइ हे पनेगु व अत्यावश्यक ज्याया निंतिं स्वनिगलय् वयेमाःसा वइम्ह मनूया छु पालिकां वइगु अनया पालिका व जिल्ला प्रशासनयात तकं अनिवार्य जानकारी बियाः जक वयेगु व्यवस्था यायेत इनाप यानागु खँ नं धयादीगु दु ।

‘मन्त्रालयं पास बीगु, अले स्वनिगलय् हयाः त्वःताबीगु याइ, थ्व लिपा वडा अध्यक्ष–सदस्यपिं उमिगु लिउलिउ वनाः मालाजुइमाःगु बाध्यता वयाच्वंगु दु, थथे जनप्रतिनिधिपिंसं लकडाउनया उल्लंघन यानाः वःपिंत मालाजुइगु ज्या व्यावहारिक जुइमखु । जिमिसं थ्व खँ गृहमन्त्रीयात प्रस्ट रुपं धयागु दु’ वय्कलं धयादिल ।

‘लकडाउनया उल्लंघन यानाः सुला सुला स्वनिगलय् दुहां वयाः स्वनिगःयात अशान्त यानाच्वंपिं न्ह्याम्हेसित हे जूसां कानुनी दायराय् हयाः कारवाही यायेत सुझाव बियागु दु । जिमिसं सुलाः सुलाः वइपिं जक मखु उमित हइपिंत नं कारवाहीया दायराय् हयेमाः धयागु दु’ वय्कलं कनादीगु दु । स्वनिगःया मेयरपिंसं बिउगु सुझावय् गृहमन्त्री सकारात्मक दुगु खँ नं वय्‌कलं धयादीगु दु ।

बैठकय् ख्वप नगरपालिकाया मेयर सुनिल प्रजापतिं भारतं हइगु सिसाबुसा, तरकारीयात बन्द यानाः स्थानीय उत्पादनयात बः बिइत सुझाव बियागु खँ धयादीगु दु ।