बिस्काः जात्रा हनेत व्यवस्थापन समिति

येँ(नेपालभाषा टाइम्स)- येँय् नं उत्तरपाखे लाःगु धार्मिक व ऐतिहासिक नगरी तोखाय् बिस्काः जात्रा हनेगु निंतिं तयारी शुरु जूगु दु । दँय्दसं बैशाख १ गते तोखाय् जुइगु सपनतीर्थ मेला व विस्काः जात्रा व्यवस्थापन, शान्ति सुरक्षा लगायतया विषययात कयाः च्वंगु बैठक च्वंगु खः ।

तोखा सांस्कृतिक संरक्षित क्षेत्र विकास समितिया नायः गणेशमान श्रेष्ठया अध्यक्षताय् च्वंगु बैठकं नगरपालिका, वडा व स्थानीय संघसंस्थाया प्रतिनिधित्व जुइकथं छगू मूल व्यवस्थापन समिति नं गठन याःगु दु । सपनतीर्थ मेला व तोखा जात्रायात व्यवस्थित, शान्तिपूर्ण, सभ्य व भव्य तरिकां सम्पन्न यायेत च्वंगु बैठकं समितिया अध्यक्ष श्रेष्ठया संयोजकत्वय् मूल व्यवस्थापन समिति गठन याःगु दु ।

व्यवस्थापन समितिइ तलेजुया मू नायः हेमराज श्रेष्ठ, नेवाः गुथि तोखायात सह संयोजक व तोखाय् क्रियाशील थीथी राजनीतिक दल, सामाजिक संघसंस्था, द्यः खलः, बाजं खलः, सुरक्षा निकाय, ट्राफिक प्रहरीया प्रतिनिधियात सदस्यकथं दुथ्याकाःगु दु । अथे हे तोखा नगरपाष्लिकाया प्रमुख, उपप्रमुख व वडा नं. २ व ३ या वडाअध्यक्ष संरक्षककथं च्वनादीगु दु ।

बैठकय् तोखा नपा २ वडाअध्यक्ष धर्मेन्द्र श्रेष्ठ, ३ वडाअध्यक्ष रमेश डंगोल, तलेजुया मू नायः श्रेष्ठलिसें सम्बन्धि द्यः खलः, बाजं खलः, राजनीतिक दल, सामाजिक संघसंस्था, नेपाल प्रहरी, ट्राफिक प्रहरीया प्रतिनिधिपिनिगु उपस्थिति दुगु खः ।

बैठकं जात्राया इलय् सवारी पार्किङया व्यवस्थापन, जात्रा यायेगु ई (तालिका), सतक मत, सुचुकुचु, चोक व द्यःयाथय् सीसी क्यामरा जडान, त्वनेगु लःया व्यवस्था, सपनतीर्थय् म्वःल्हुइत व वस हिलेत आवश्यक थाय्, सार्वजनिक चःबि आदि व्यवस्थापनया विविध विषययात कयाः सहलह याःगु खः ।