मध्यपुर थिमिइ निगू राजमार्ग बाहेकया फुक्कं लँ बन्द याइगु

येँ – मध्यपुर थिमि नगरपालिकां अरनिको राजमार्ग व ख्वप वनेगु पुलांगु सतक राजमार्ग बाहेकया फुक्कं लँ पूर्ण रुपं बन्द यायेगु निर्णय याःगु दु ।

थिमिइ च्वनाच्वंम्ह छम्हेसित कोरोना भाइरसया संक्रमण खनेदयेवं थौं च्वंगु नगरपालिकाया मुँज्यां मेमेगू लँय् सार्वजनिक आवगमन पूर्णरुपं निषेध यायेगु निर्णय याःगु खः । नगरपालिकां थःगु लागा दुने लाःगु क्षेत्रय् खाद्यवस्तु, वासः पसः व अति आवश्यक वस्तुया पसः सुथय् ९ बजे तक जक चायेकेबीगु निर्णय नं याःगु दु । मेमेगू व्यवसाय धाःसा मेगू सूचं जारी मजुतले पूर्ण रुपं बन्द यायेत नगरपालिकां इनाप याःगु दु ।

अथेहे नगर दुनेया छेँय् सुं बालं च्वनाच्वंपिं स्वनिगः पिने वंगु दुसा अज्याःपिंत लिहांमवेत इनाप यायेत व यदि लिहांवःसा परीक्षण मयासें प्रवेश मयोकेत नं नगरपालिकां इनाप याःगु दु । यदि सुनं पिनें वःपिंत छेँ दुकाःसा छेँ थुवाःतय्त कडा कारवाही यायेगु निंतिं सम्बन्धीत ज्याकूथी सिफारिश यायेगु खँ नगरपालिकां धाःगु दु ।