जल प्याखंयात थप आर्थिक ग्वाहालि

यल- यल महानगर पालिकां ऐतिहासिक, सांस्कृतिक व धार्मिक महत्वं जाःगु जल प्याखंया संरक्षणया निंतिं थप आर्थिक ग्वाहालि याःगु दु । यल महानगर जल प्याखंया संरक्षणया निंतिं अक्षय कोष स्वनेत ५० गू लख आर्थिक ग्वाहालि याःगु खः ।

यल महानगरं जल प्याखं संरक्षणया निंतिं कोष स्थापनार्थ न्हापांगु चरणय् वंगु असार १२ गते २५ गू लख दां ग्वाहालि याःगु खःसा वंगु छुं दिं न्ह्यः थप २५ गू लख ग्वाहालि याःगु खः । यल महानगर प्रमुख चिरिबाबु महर्जनं हरिसिद्धि त्रिशक्ति भावनी सेवा समितिया नायः धनबहादुर महर्जनयात छगू ज्याझ्वःया दथुइ २५ गू लखया चेक लःल्हानादीगु खः ।

ज्याझ्वलय् नवासें यल महानगर प्रमुख महर्जनं जात्रा, पर्व, संस्कृति, सम्पदाया संरक्षण याये अतिकं आवश्यक जूगु खँय् बः बियादिसें उकिया निंतिं यल महानगरं अक्षय कोष स्वनेत ग्वाहालि याना वयाच्वनागु जानकारी बियादिल ।

ज्याझ्वलय् यल महानगर २८ वडाअध्यक्ष राजेश महर्जन व २९ वडाअध्यक्ष गणेश महर्जनं नं थःथःगु नुगःखँ तयादीगु खः ।