शंखधर व पद्मरत्नया झ्वाता छन्हुं हे उलेज्या

येँ (नेपालभाषा टाइम्स) – नेपाल संवत्या प्रवर्तक शंखधर साख्वाः व नेवाः न्ह्यलुवा लिसें नेपाल संवत्या न्हूदँ आन्दोलनया नेता पद्मरत्न तुलाधरया झ्वाता छन्हुं हे उलेज्या याइगु जूगु दु । येँ महानगरपालिकां थनया शंखधर पार्क (पुलांगु रत्न पार्क) दुने वय्कःपिं निम्हेसिगुं झ्वाता पलिस्था यायेत्यंगु खः । थ्वहे वइगु शनिवाः छगू ज्याझ्वःया दथुइ शंखधर पार्क दुने येँ मनपाया मेयर विद्यासुन्दर शाक्यपाखें शंखधर साख्वाः व पद्मरत्न तुलाधरया झ्वाता उलेज्या यायेत्यंगु खः । वय्कःपिं निम्हेस्यां झ्वाता तयेगु बारे येँ महानगरपालिकां थगुने हे सार्वजनिक घोषणा यासें तयारी ज्या न्ह्याकूगु खः ।