‘राज्यपाखें प्रेस स्वतन्त्रताय् हाथ्या वयाच्वन’

येँ – नेवाः पत्रकार राष्ट्रिय दबूपाखें नेपाःया संविधानया मूल मर्म व भावना कथं नेपाःया संचार ख्यःया विकासय् खनेदयेमाःगु ह्यूपाःया निंतिं हाथ्या वयाच्वंगुलिं चिउताः प्वंकूगु दु ।

विश्व प्रेस स्वतन्त्रता दिवसया लसताय् छगू विज्ञप्ति पिथंसें पत्रकार दबूलिं राज्यं हे संविधानया भावना अःखः थीथी ऐन व कानून दयेकाः प्रेस स्वतन्त्रता हनन् यायेत स्वःगु धाइगु ह्यूपाःया निंतिं हाथ्या जूगु खँ धाःगु दु ।

प्रेस स्वतन्त्रता धइगु नागरिक स्वतन्त्रताया थां जूगुलिं पत्रकारिता ख्यःयात मर्यादित, जिम्मेवार व जवाफदेही ख्यः दयेकेत स्वनियमन प्रणालीया विकास यानाः अझ अप्वः व्यवस्थित यायां वनेगुपाखें नं दबूपाखें ध्यानाकर्षण याकूगु दु ।

प्रेस स्वतन्त्र व निष्पक्ष जुइत संचार ख्यः समावेशी मजुइकं मगाः धासें दबूलिं प्रेस स्वतन्त्रताया दिनं न्याय, समानता व स्वतन्त्रताया पक्षय् अझ सशक्त जुयाः न्ह्यांवनेत सकसित शक्ति बीमा धासें भिंतुना नं बिउगु दु ।