स्वनिगलय् हिया अभाव, भाः नं थहां वन

येँ – स्वनिगलय् ल्वगियात माःगु हिया अभाव जूगु दु । मोहनि स्वन्ति थेंज्याःगु तःधंगु नखःया कारणं स्वनिगलय् ल्वगितयात बीत माःगु आवश्यक हिया अभाव जूगु खँ धाःगु दु ।नेपाल रेडक्रस सोसाइटी केन्द्रीय रक्तसंचार सेवा केन्द्रया कथं नखःया कारणं स्वनिगलय् गुलि हि संकलन जुइमाःगु खः, उलि जुयाच्वंगु मदु ।

सवारी दुर्घटनालिसें मेमेगु घटना लानाः घाःपाः जूपिं, शल्यक्रिया यायेमाःपिं ल्वगि, डेंगु संक्रमणलिसें शल्यक्रिया यानाः मचा बुइकिपिंत हिया अति आवश्यक जुइगु खः । तर थ्व इलय् हिया अभावया कारणं समस्या जुया बिउगु दु । मेमेगु दिनय् न्हियान्हिथं धइथें हिदान जुयाच्वनीगु खःसां थ्व इलय् नखःया कारणं हिदान ज्याझ्वःत नं स्थगित जुयाच्वंगु दु ।

स्वनिगलय् जक न्हिं ३०० निसें ३५० पिन्ट हिया माग दुसा माग कथं हि संकलन याये धाःसा फयाच्वंगु मदु । थ्व हे झ्वलय् हिया भाः नं थहां वंगु दु । ब्लड बैंकया कथं हि प्रति युनिट १०० तका थहां वंगु दु । नेपाल सरकारया राष्ट्रिय रक्तसंचार ब्यूरोया निर्णयकथं रिफ्रेसमेन्ट व मेमेगु खर्च व्यवस्थापनया निंतिं धासें हिप्रति युनिट १०० तका थकायेगु निर्णय याःगु खः ।