भ्वँतय् न्हापांखुसी नेपालभाषा साहित्य तःमुँज्या

भ्वँत (नेपालभाषा टाइम्स)- सकिमना पुन्हिया लसताय् भ्वँतय् न्हापांगु नेपालभाषा साहित्य तःमुँज्या जूगु दु । भ्वँतया लाय्कू दबुलिइ जूगु तःमुँज्या स्थानीय समाजसेवी कृष्णलाल प्रजापतिं उलेज्या यानादिल । ज्याझ्वःया मू पाहां नेपाल मजदुर किसान पार्टीया केन्द्रीय सचिव सांसद प्रेम सुवालं साहित्य छगू विज्ञान हे खः धयादिसें नेपाःया अर्थतन्त्र स्यंगुलिइ नेपाली राजनीतिक नेतात दोषी जूगु खँ स्पष्ट यानादिल ।

ज्याझ्वलय् बागमती प्रदेशया सांसद सुरेन्द्रराज गोसाईं व मेम्ह सांसद सृजना सैंजुपिंसं नं थःथःगु राजनीतिक धारणा न्ह्यब्वयादीगु खः । छन्हु न्हिछि जूगु ज्याझ्वलय् मूपाहां प्रेम सुवालं गं प्याखं व बाजंया गुरु सत्यनारायण डंगोल व किसान न्ह्यलुवा मंगलराज मानन्धरयात दोसल्लां न्ययेकाः हना पौ देछासें हनेज्या यानादीगु खः ।

ज्याझ्वलय् साहित्यकार मोहन दुवाल, शिक्षाविद सूर्य लाकोल लगायतं थःथःगु नुगः खँ कनादीगु खः । उगु तःमुँज्याय् पाठ जूगु झिंछपु चिनाखँ मध्ये प्रकाश कायस्थ उज्ज्वल न्हाप, धु्रवकृष्ण ताम्राकार लिउ व सुनिता गांसी लियां लिउ लाःगु खः ।

समाजसेवी हरिगोपाल प्रधानया सभापतित्वय् जूगु न्हापांगु तःमुँज्याय् सिद्धिबहादुर कर्माचार्य, सोमकाजी शाक्य, शमशेरबहादुर न्हुछेँ प्रधान, नरेन्द्र कुमार बज्राचार्य, रामकृष्ण प्रजापति, हर्षनारायण कर्माचार्य व कविता शाक्यं थःथःगु च्वसु न्यंकादीगु खः । पाठ याःपिं रचनाकारतय्त दसि पौ लःल्हाःगु खः । ज्याझ्वलय् सफू ब्वज्या व यःमरि नकेज्या नं जूगु खः ।