
येँ – थनया बसन्तपू लाय्कूस्थित नौतले मन्दिरया पुनःनिर्माणं तीव्रता काःगु दु । चीन सरकारया ग्वाहालिं निर्माण जुयाच्वंगु हनुमानध्वाखा लाय्कू लागाया उगु देगः पुनःनिर्माणं लिपांगु इलय् तीव्रता काःगु दु । २०७२ सालया भुखाचं गुतँ जाःगु उगु देगःया बछि ब्वः पाःताः जुइक दुना वःगु खः ।
बसन्तपू–हनुमानध्वाखा लाय्कू लागाया आपालं धार्मिक, सांस्कृतिक, पुरातात्विक महत्वया सम्पदात भुखाचं क्षतिग्रस्त जूगु खः । भुखाय् लिपा उगु देगः चीन सरकारया ग्वाहालिं पुनःनिर्माण जुयाच्वंगु खः । सन् २०२२ तकया दुने देगः दने क्वचायेकेगु सम्झौता यानाः व हे कथं न्ह्यानाच्वंगु देगःया ज्या ८० प्रतिशतं मल्याक सिधयेधुंकूगु प्राविधिक ग्वाहालि यानाच्वंगु पुरातत्व विभागं न्ह्यथंगु दु ।
विश्व सम्पदाया क्षेत्र दुने लाःगु देगःया पुलांगु स्वरुप व संरचनायात मस्यंकुसे क्षतिग्रस्त जूगु भागया जक प्रबलीकरण व संरक्षण यायेगु ज्या जुयाच्वंगु दु । पुरातत्व विभागं देगः पुनःनिर्माणया निंतिं परम्परागत सामग्री उपलब्ध याकेगु व सुपेरीवेक्षण यायेगु ज्या यानाच्वंगु दु ।
१६ गू करोड लागतय् पुनःनिर्माण जुयाच्वंगु देगः पुनःनिर्माणया निंतिं २०७२ साल साउन ३२ गते शिलान्यास यायेगु ज्या जूगु खः । उगु इलय् नेपाः भ्रमणय् वयाच्वनादीम्ह चिनिया उपप्रधानमन्त्री वाङ याङ व तत्कालीन उपप्रधानलिसें परराष्ट्रमन्त्री कृष्णबहादुर महरां मंकाःकथं देगः पुनःनिर्माणया शिलान्यास यानादीगु खः ।
LEAVE YOUR COMMENTS