बीआरआईयात काउन्टर बीगु हतियार दयेकल धाःसा ‘एमसिसिइ चीनं विरोध यायेफु’

येँ (नेपालभाषा टाइम्स) – अमेरिकां मिलेनियम च्यालेन्ज कर्पोरेशन (एमसीसी) यात चीनया बेल्ट एण्ड रोड इनिसियटिभ (बीआरआई) यात काउन्टर बीगु हतियार दयेकल धाःसा चीनं एमसीसीया सशक्त विरोध याइगु खँ धाःगु दु ।

एसियन इन्ष्टिच्युट अफ डिप्लोमेसी एण्ड इन्टरनेशनल रिलेसनं ग्वसाः ग्वःगु नेपाल-भारत-चीन सहकार्य सम्बन्धी छगू वेबिनार ज्याझ्वलय् न्ववासें चीनया हुबेई युनिभर्सिटीया नेपाल अध्ययन केन्द्रया निर्देशक प्रोफेसर चाङ सुविनं उगु खँ धयादीगु खः । वेबिनारय् न्ववायेगु झ्वलय् चाबं नेपाल सरकार व नेपाःमि जनतां राष्ट्रिय हितयात केन्द्रय् तयाः बुद्धिमतापूर्वक निर्णय काइगु अपेक्षा नं थःम्हं यानागु खँ धयादीगु खः ।

वय्कलं धयादिल, ‘यदि अमेरिकां वास्तवय् हे एमसीसीपाखें नेपाःया पूर्वाधार निर्माणय् ग्वाहालि यायेत स्वःगु खःसा नेपाःया पासापिसं एमसीसीं नेपाःया सार्वभौमसत्ता व आर्थिक विकासय् लाकेफइगु असरसम्बन्धी चिन्तायात सम्बोधन यायेगु निंतिं थुकियात माःकथं संशोधन यात धाःसा अःपुइ ।’

वय्कलं न्ह्यःने धयादिल, ‘छिकपिंत ताः, एमसीसी बांलाः अथे खःसा थुकियात स्वीकार यानादिसँ, बांमलाःसा गुगुं नं हिचकिचे मजूसे अस्वीकार यानादिसँ, जितः ताः थ्व सम्बन्धय् श्रीलंकां नेपाःया निंतिं छगू उदाहरण पेश याःगु दु ।’

ज्याझ्वलय् न्ववासें अमेरिकाया हावर्ड विश्वविद्यालय अन्तर्गतया हावर्ड एसिया सेन्टरया अनुसन्धानकर्ता अनु अनवरं नेपालं दकलय् न्हापां थःगु राष्ट्रियता म्हसिकाः भारत व चीन निगुलिं देय् लिसे सहकार्य यायेमाःगु सुझाव बियादीगु दु । वय्कलं धयादिल, ‘भारत व चीनया दथुइ नेपाः दु, विश्वय् स्वयेगु खःसा चीधंगु देशं नं देय्या बांलाक विकास यानाः शक्ति आर्जन याःगु दु। उदाहरणया निंतिं बेल्जियम व सिंगापुरयात कायेफइ ।’

वय्कलं दक्षिण एसियाया चीधंगु देशं तःधंगु देय् लिसे प्रतिस्पर्धा मयासें आर्थिक विकासया निंतिं सहकार्य यायेमाःगु खँ धयादीगु दु। लिसें वय्कलं दक्षिण एसियाय् अमेरिकां इन्डोप्यासेफिक रणनीति अन्तर्गत थीथी भूमिका म्हितूगु खःसां नं दक्षिण एसियाया विकासया निंतिं योगदान यायेफइगु कथं मवःगु खँ नं धयादीगु दु ।

सम्बन्धित बुखँ

LEAVE YOUR COMMENTS