बलिउड अभिनेता ऋषि कपुर मन्त

येँ – बलिउडया लाेकंह्वाःम्ह अभिनेता ऋषि कपुर थौं सुथय् मन्त । क्यान्सर ल्वचं कयाच्वम्ह कपुर ६७दँया वैशय् मदुगु खः । सासः ल्हाये थाकुया बुधवाः जक कपुरयात मुम्बईया सर एचएन रिलायन्स अस्पतालय् भर्ना याकूगु खः । वय्कः थौं सुथय् अस्पतालय् हे मदुगु खः । वय्कः दच्छि न्ह्यः अमेरिकाय् वनाः क्यान्सरया वासः याकाः सेप्टेम्बरय् जक भारत वःगु खः । भारत लिहांवयेधुंकाः नं हानं म्हःमफेवं वय्कःयात अस्पतालय् निक्वः तक भर्ना याकेमाःगु खः ।

सन् १९७३य् ‘बबी’ फिल्मं करियर सुरु याःम्ह ऋषि कपुरं वस्वयां न्ह्यः बाल कलाकारया रुपय् ‘श्री ४२०’ व ‘मेरा नाम जोकर’य् नं अभिनय यायेधुंकूगु खः । ऋषि कपुरं दकलय् लिपा कलाकार इमरान हाशमी नाप ‘द बडी’ नांया संकिपाय् अभिनय यानादी खः ।

ऋषि कपुर बलिउडया नांजाःम्ह अभिनेता राज कपुरया काय खः । ऋषिया कला नितू कपूर नं बलिउडकया अभिनेत्री खःसा काय रणविर कपूर बलिउडया चर्चित अभिनेता खः ।