थप स्वम्हेसिके कोरोना पुष्टि

येँ – भारतया दिल्लीइ जूगु मुस्मांतय् धार्मिक सभाय् ब्वति कयावःपिं थप स्वम्हेसिके कोरोना संक्रमण पुष्टि जूगु दु । राष्ट्रिय जनस्वास्थ्य प्रयोगशालाय् यानास्वःगु उमिगु स्वाब परिक्षण लिपा थौं (बुधवाः) बाराया निम्ह व पर्साया छम्हेसिके कोरोना खनेदुगु खँ धाःगु खः ।

संक्रमित मध्ये छम्ह जितपुर सिमरा नगरपालिकाया ४३ दँ दुम्ह, सिम्रौनगढया ३१ दँया दुम्ह व वीरगञ्ज २ छपकैयाया ४६ दँ दुम्ह मिजंत जूगु खँ धाःगु दु । थुपिं स्वंम्हं दिल्लीया तबलिगी जमातया धार्मिक सभाय् वनाः लिहां वःपिं खः ।
थुपिं स्वम्हेसितं उगु हे धार्मिक सभाय् वनाः वःपिं संक्रमितत लिसे स्वापू दुपिं कथं ट्रेसिङ याःगु खः ।

थथे ट्रेसिङ यायेगु झ्वलय् उपिं थःपिं हे जमानय् वनावःपिं सीदुगु खःसा थ्व लिपा उमित क्वारेन्टाइनय् तयातःगु खः ।

आः नेपालय् कोरोना संक्रमण जूपिनि ल्याः ५७ म्ह थ्यंगु दु ।