संविधानयात ट्रायकय् हयागु दावी

येँ (नेपालभाषा टाइम्स)- प्रधानमन्त्री पुष्पकमल दाहालं नागरिकता विधेयक प्रमाणीकरण यानाः राष्ट्रपतिं संविधानयात ट्रयाकय् हःगु खँ धयादीगु दु । लिसे वय्कलं निगुलिं सदनं निक्वः तक पास यानाः छ्वःगु विधेयक प्रमाणीकरण मयाःसां जिउगु नजिर च्वन धाःसा कन्हय् छु जुइ धकाः न्ह्यसः नं तयादीगु दु ।

म्हिगः प्रतिनिधिसभाय् ब्वलंगु न्ह्यसःया लिसः बीगु झ्वलय् प्रधानमन्त्री दाहालं संसदं निक्वःखुसी पास याःगु विधेयक तत्कालीन राष्ट्रपतिं प्रमाणीकरण मयाःगुलिं संवैधानिक व्यवस्थाया उल्लंघन जूगु खँ धासें धयादिल, ‘इफ बट छुं मदुगु, अनिवार्य रुपय् यायेमाःगु प्रमाणीकरण मयानाः संविधान संकटय् लाःगु खः । ’

थःगु नेतृत्वया सरकारं संविधानयात ट्रयाकय् हयेत संवैधानिक उपाय छु खः धकाः मालागु खँ कनादिसें मालेगु झ्वलय् राष्ट्रपतिं तप्यंक प्रमाणीकरण यायेमाः, संसदं यंकेमाः धइगु मत नं वःगु खँ कनादिल । वय्कलं क्याबिनेटं सिफारिस मयानागु खँ धासें प्रमाणीकरण यायेत इनाप जक यानागु खँ नं धयादीगु दु ।

थ्व विधेयकया स्थिति विशिष्ट दुगु धासें वय्कलं अथे हें त्वःतल धाःसा लोकतन्त्र व संविधानय् हे खतराय् लाइगु जोखिम दु धासें धयादिल, ‘कन्हय् संवैधानिक परिषदं निर्णय यात, तर राष्ट्रपतिं हाकनं पनाबिल धाःसा छु जुइ ? निगुलिं सदनं पारित जूगु विधेयक हाकनं दराजय् तुं लात धाःसा छु जुइ ? झीगु लोकतन्त्रया भविष्य छु जुइ ?’

राष्ट्रपतिं थःत यःसा विधेयक प्रमाणीकरण यायेगु थःत मयःसा मयायेगु खःसा संविधान व लोकतन्त्रय् घात जुइगु प्रक्रिया न्ह्याइ धइगु सरकारया बुझाइ खः धासें सरकारं म्हो क्षति सहित संविधानयात ट्रायक हयेगु खँ धयादिल । लिसें प्रधानमन्त्री दाहालं थ्व विषय अदालतय् वनेधुंकूगु व अल्पकालीन अन्तरिम आदेश वयेधुंकूगु धासें अदालतया फैसला लिपा बहस यायेगु खँ नं धयादिल ।