बालेनया पहः खनाः प्रम दाहाल इरिटेड !

येँ (नेपालभाषा टाइम्स)- यल महानगरपालिकाया १०५ क्वःगु स्थापना दिवसया म्हिगः जूगु समारोहय् मूपाहां प्रधानमन्त्री पुष्पकमल दाहालं येँ मनपाया मेयर बालेन साहया पहःयात कयाः तं प्वंकादिल । ज्याझ्वलय् मेयर साहं संघीय सरकारपाखें थःपिंत ग्वाहालि मयाःगु द्वपं बिसें प्रधानमन्त्रीं चाहे जुल धाःसा खुसि अतिक्रमणया समस्या न्यागू मिनेटं समाधान यायेफु धयादिल ।

लिसें वय्कलं गुलिखे थासय् जुयाच्वंगु अतिक्रमण फुटपाथ अतिक्रमण थःपिंसं हे चीकेफुसां नं खुसि अतिक्रमण धाःसा थःपिंसं चीके फइ मखु धासें उकी सरकारया ग्वाहालि आवश्यक जू धकाः टिप्पणी यानादीगु खः । वय्कलं सुकुम्बासी चीकेगु ज्याय् सरकारं ग्वाहालि मयाः धइगु संकेत कथं अथे धयादीगु खः । वय्कः उलि न्ववानाः वना हे छ्वत ।

वयां लिपा न्ववानादीम्ह प्रधानमन्त्री दाहालं थज्याःगु ज्याझ्वलय् वयेबलय् थःगु खँ तयेगु तर उकिया लिसः मन्यँसे लिहां वनीपिं मनूत खनाः थःत इरिटेशन जुइयः धयादिल । अथे हे वय्कलं बागमती खुसि सिथय् च्वंगु सुकुम्बासी बस्ती वा तीनकुने व फोहोर व्यवस्थापनया नितिं मिले जुयाः ज्या यायेगु पहल थम्हं यानागु खँ धयादीगु दु । वय्कलं स्थानीय तहपाखें जुइमाःगु ज्याखँय् यदि छुं ज्या मजुल धाःसा उकिया जवाफदेवी स्थानीय तह हे जुइमाःगु दावी नं यानादिल ।

वय्कलं थुकथंया सार्वजनिक समारोहय् वयेबलय् मूपाहानं न्वमवाःतले च्वनेगु धैर्य दयेमाः धासें मेयर साहया पहःयात आलोचना नं यानादिल ।