एअरपोर्टय् भन्सार कर्मचारीया हडताल

येँ (नेपालभाषा टाइम्स)- ६१ किलो लुँ काण्डय् त्रिभुवन विमानस्थल भन्सारया कर्मचारीतय्त नं अनुसन्धान न्ह्याकल धासें म्हिगः कर्मचारीतय्सं आन्दोलन घोषणा याःगु दु । प्रहरी लिसें थीथी निकायं लुँ तस्करीया अनुसन्धान यायेगु धकाः थःपिंसं अनावश्यक दुःख बिउगु धासें म्हिगः स्वघौ पेन डाउन नं याःगु खः ।

कर्मचारीतय्सं थःपिनि विरोध ज्याझ्वःबारे विमानस्थल कार्यालय लिसें भन्सार विभाग व अर्थ मन्त्रालययात नं जानकारी याकूगु दु । उमिसं थौं व कन्हय् कार्गो जाँचपास शाखापाखें जुइगु निकासी व पैठारीया ज्या बन्द यायेत्यंगु दु । भदौ २७ गते तक थःपिनि माग पूमवन धाःसा यात्रु जाँचपास शाखां जुइगु ज्या नं प्रभावित जुइ फइगु ख्याच्वः बिउगु दु ।

वंगु साउन २ गते विमानस्थलं ८१ किलो लुँ सुचुका हःगु ब्रेक सू दुने सुचुकाः हःगु लुँ जाँचपास जूसां नं विमानस्थलया कर्मचारीपाखें भिंगु नियतं याःगु न्हिथंया प्रशासनिक ज्यायात तकं हतोत्साहित यायेगु वातावरण दयेकाच्वंगु द्वपं बिउगु दु ।

म्हिगः जारी याःगु विरोध पतिइ धयातःगु दु, ‘कर्मचारीया मनोबल क्वकायेगु, आत्मसम्मानय् घाः लाकेगु ज्या थीथी निकायपाखे निरन्तर जुयाच्वंगु दु । थज्याःगु ज्या बन्द मयाःतले कार्यालयया न्हिथंया ज्या सञ्चालन यायेत असमर्थ जूगु ख्याच्वः थ्व स्वयां न्ह्यः बीधुनागु दु ।’ उकथं हे कर्मचारीपिसं मंकाः कथं थःपिनिगु सरुवा यायेमाःगु माग नं याःगु दु ।