थिमि भुयुसिन्हलं छाय्पिल

बिस्काः जात्राया झ्वलय् मध्यपुर थिमिया स्थानीवासीं म्हिगः बैशाख २ गते भुयुसिन्हः जात्रा न्यायेकल । मध्यपुर थिमिया स्थानीयवासी सुथ न्हापां हे हर्षोल्लासपूवक भुयुसिन्हखय् म्हिताः ‘सुथसिया जात्रा’ न्यायेकूगु खः । सुथ न्हापां हे मध्यपुर थिमिया त्वाः त्वालं थीथी द्यःपिनि मूर्तियात खतय् बिज्याकाः खः कुबिया सिन्हः जात्रा यायां पुजाआजाया लिसें थ्व जात्रा न्यायेकूगु खः ।

थिमिइ जक न्यायेकीगु थ्व जात्राय् छम्हं मेम्हेसित भुयुसिन्हः इकाः धिमे लगायत स्थानीय बाजंलिसें प्याखं हुलाः ल्हातय् चिलाख ज्वनाः द्यःखः कुबियाः थिमिया बालकुमारिइ स्वीनिखः द्यःखः हयाः थ्व जात्रा न्यायेकेगु परम्परा दु । थ्व जात्राय् म्हिगः सुथ न्हापां हे बालकुमारी व कालिका अर्थात् बालाखुया खः बालकुमारी देलं पित हःगु खः । म्हीगनिसें विष्णुवीर व दक्षिण वाराहीया खः तकं देगलय् हयाः तयातःगु खः ।

सुथ न्हापां सिद्धिकालीया खः हयाः थःथःपिनि गणतलिसें बालकुमारीइ प्रवेश याकेवं थ्व जात्रा शुरु जूगु खः ।जात्रा शुरु जुइधुंकाः पःमांतय्सं थःथःगु ल्हातय् चिलाख ज्वनाः नाइके प्रधानया अनुमतिइ बालकुमारीया द्यःखः ल्ह्वनेवं जात्रायात दिगुत्वालय् च्वंगु द्यःया छेँया परिक्रमा याकूगु खः । अथे हे विष्णुवीर, सिद्धिकाली लगायत देवदेवीया खः हयाः थ्व जात्रा न्यायेकूगु खः ।

थिमिइ स्वीनिखः द्यःखःलिसें सहभागित खः कुबियाः परम्परागत रुपय् न्यायेका वयाच्वंगु थ्व जात्राय् आः थिमि क्षेत्रया नीस्वखः, नगदेशय् छखः, बोडय् न्हय्खः व तिग्नीय छगू थासय् खः जात्रालिसें न्यायेकूगु खः । थुकी थिमिया बालकुमारी, दक्षिणवाराही, विष्णुवीर, सिद्धिकाली, नगदेशया सिद्धिगणेश, बोडेया महालक्ष्मी व तिग्नीया नीलबाराही देगःया द्यःया नेतृत्वय् खः कुबियाः जात्रा यानाः त्वाःत्वालय् भुयुसिन्हः ह्वलाः जात्रा न्यायेकेगु याइ ।

द्यः लाय्कुलिइ दुहां वने मखनेमा धइगु ल्याखं लाय्कुलिं दुहां वनेगु मूलुखाय् लँ पनाः प्यंखा मुस्या, बालकुमारी, बालखुचा द्यः, सिद्धिकाली व मेमेपिं देवगणत लँ पनाः च्वनेगु परम्परा दु ।

मूल द्यः खतय् बिज्याकाः धिमे बाजंलिसें चिलाख च्याकाः सुथसिया जात्रा न्यायेकेगु परम्परा दु । जात्रा प्रत्येक चोक, प्यदुवाः छेँ व त्वालय् थ्यनीगु इलय् छेँया झ्याः, कःसि व पल्लिं सिन्हः ह्वला हयेगु व स्वां वा गायेकाः लसकुस यायेगु प्रचलन दु । जात्राय् धिमे, भुस्याः, नाय्खिं, छुस्याः थेंज्याःगु बाजं थानाः द्यःखःयात चाःहिकाः छम्हं मेम्हेसित सिन्हः तिकेगु, इकेगु व थवंथवय् भुयुसिन्हः छवाकाः स्थानीय जात्रालुतय्सं न्ह्यइपुकीगु जूगुलिं नं थ्व जात्रायात भुयुसिन्हः जात्रा धायेगु यानातःगु खः ।

बालकुमारीं परम्परागत रुपय् सिद्धिगणेश, सिद्धिकाली, व वया गणतलिसें क्वाःछेँ द्यः, हिच्व द्यः, अजिमा द्यः, विष्णुवीर व मेमेपिं देवगणया खः ल्हवनेवं बालकुमारीया जात्रा शुरु यायेगु याइ । परम्पराकथं हे द्यः लाय्कुलिइ दुहां वने मखनेमा धइगु ल्याखं लाय्कुलिं दुहां वनेगु मूलुखाय् लँ पनाः प्यंखा मुस्या, बालकुमारी, बालखुचा द्यः, सिद्धिकाली व मेमेपिं देवगणत लँ पनाः च्वनेगु परम्परा दु ।

न्ह्यःने हयाच्वंम्ह बालकुमारीयात भैलःद्यवं परिक्रमा यायेवं छसिकथं सुगांद्यः, क्वाःछेँ द्यवं नं भुयुसिन्हः म्हिताः परिक्रमा याइ । बालकुमारीयात थीथी क्षेत्रया परिक्रमा याकाः हर्षोल्लास, उत्साह व उमंगया लिसें थिमिया स्थानीयवासीं भुयुसिन्हः म्हिताः थ्व जात्रा न्यायेकूगु दु ।

सुथसिया जात्रालिसें भुयुसिन्हः जात्रा नं धाइगु थ्व जात्राय् न्हापा न्हापा मध्यपुर थिमिन्यंकंया स्वीनिखः द्यःखःया जात्रा याइगु खःसां थौंकन्हय् छुं छुं द्यःखः आन्तरिक कारणं महःगुलिं आः करिब निगू दर्जन द्यःखः जात्राय् सहभागि जुयाच्वंगु संचारकःमि केके मानन्धरं कनादिल ।

सम्बन्धित बुखँ

LEAVE YOUR COMMENTS