प्रम–प्रधानन्यायाधीश चान्हय् नापलाःगु हल्लां राजनीति तरंगित
येँ – प्रधानमन्त्री केपी शर्मा ओलीं निक्वःखुसी संसद विघटन याःगु विरुद्ध सर्वोच्च अदालतय् रिट लानाच्वंगु इलय् म्हीग सर्वोच्चया प्रधानन्यायाधीश चोलेन्द्र शमशेर जबरा व प्रधानमन्त्री ओली दथुइ वालुवाटारय् खँल्हाबल्हा जूगु हुइनाभुइना पिहां वःगु दु । थ्व हुइनाभुइना बारे थवंथवय् खण्डन मण्डन जुयाच्वंसां पुलांम्ह प्रधानमन्त्री लिसें जनता समाजवादी पार्टी संघीय परिषदया अध्यक्ष डा. बाबुराम भट्टराईनं धाःसा थुकिया विरुद्ध थःपिनि टिप्पणी समेत सार्वजनिक यानादीगु दु ।
म्हिगः छगू ट्विट यासें धयादीगु दु, ‘प्रधानन्यायाधीशयात प्रमं थःगु निवासय् सःतेगु, विदेशी दूतं पटक पटक नापलायेगु थेंज्याःगु समाचार-हल्ला लोकतन्त्रया निंतिं शुभ संकेत मखु, खिलराज रेग्मी प्रकरण अन्तरिम संविधानकालया अपवाद खः, उगु नियम नजिर जुइ फइ मखु ।’
लिसे वय्कलं राज्यया प्रमुख अंगत त्यात्या यानाः संविधान व लोकतन्त्र म्हासे यायेगु कासा सफल मजुइमा धकाः कामना नं यानादीगु दु ।
थ्वहे झ्वलय् सर्वोच्च अदालतं म्हिगः छगू विज्ञप्ति पित बिसें प्रधानन्यायाधीश चोलेन्द्रशम्शेर जबरां प्रधानमन्त्री केपी शर्मा ओलीयात नापमलाःगु खँ स्पष्ट याःगु दु । सर्वोच्चया सहप्रवक्ता देवेन्द्र ढकालं जारी याःगु उगु विज्ञप्तिइ प्रधानन्यायाधीश व प्रधानमन्त्री नापलात धकाः थीथी सञ्चार माध्यमय् वःगु समाचार सत्य मखुगु खँ धयातःगु दु ।
मेखे डा. भट्टराईया स्वकीय सचिव रोशन पोखरेलं धाःसा भट्टराईनं यानादीगु ट्वीट आधिकारिक जूगु दावी यानादीगु दु । वय्कलं प्रधानन्यायाधीश प्रम निवास वंगु इलय् थःपिंत सुचं वःगु धासें डा. भट्टराईनं बिना आधार अज्याःगु ट्वीट खइ मखु धकाः नं धयादिल । वय्कलं धयादिल, ‘देय्या इमान्दार कर्मचारीत देशय् छुं नं कथंया दुर्घटना मजुइमा धकाः आः नं सचेत जुयाच्वंगु दु, अज्याःपिं इमान्दार कर्मचारीतय्सं हे डा. भट्टराईयात थ्व सुचं बिउगु खः ।’
थ्व विषयय् छुं अनलाइनतय्सं नं समाचार बिसें म्हीग बहनी १०.१५ बजेनिसें ११ बजे तक प्रधानन्यायाधीश वालुवाटारय् दुगु व वय्कः थःगु हे गाडीं ३ नम्बर गेटं दुहां वनाः ३ नम्बर गेटं हे पिहां झाःगु खँ च्वयातःगु दु ।
विघटन विरुद्ध सर्वोच्चय् दर्जनौं मुद्दा
संसद विघटन विरुद्ध सर्वोच्च अदालतय् दर्जनौं मुद्दा दर्ता जूगु दु । थुकिं यानाः सर्वोच्चय् हानं छक्वः राजनीतिक मुद्दा प्रवेश जूगु दुसा सर्वोच्चया प्रधानन्यायाधींश नापं मेमेपिं न्यायाधीशतय्त तकं तःधंगु तनावय् लाका बिउगु दु । थुगुसी प्रम व राष्ट्रपतिं संसद भंग याःगु संवैधानिक मजू धइगु मुद्दाया नापनापं शेरबहादुर देउवायात प्रम दयेकेमाःगु, केपी ओलीयात हे प्रम नियुक्त यायेमाःगु आदि समेत मुद्दा लानावंगु दु । लिसें प्रम व राष्ट्रपतिं सर्वोच्च अदालतया अपमान याःगु धइगु समेत मुद्दा लानाच्वंगु खँ नं सीदुगु दु ।
LEAVE YOUR COMMENTS