फिफा विश्वकप-२०२६ : फ्रान्सयात बुकाः इंग्ल्याण्ड स्वंगूगु थासय्
एजेन्सी – फिफा विश्वकप २०२६य् इंग्ल्याण्डं फ्रान्सयात बुकाः सुखद अन्त्य याःगु दु । जारी विश्वकप अन्तर्गत आइतवाः चान्हय् स्वंगूगु थाय्या निंतिं जूगु कासाय् इंग्ल्याण्डं फ्रान्सयात ६–४ गोलं बुकाः स्वंगूगु थासय् वःगु खः ।
मुक्कं झिगू गोल जूगु कासाय् इंग्लिश कासामि बुकायो साकां ह्याट्रिक याःगु खः । मियामी रंगशालाय् जूगु कासाय् साकां याःगु निगू गोलया ग्वाहालिं इंग्ल्याण्डं न्हापांगु हाफय् ४ गोलया अग्रता काःगु खः । न्हापांगु हाफया स्वंगूगु मिनेटय् हे डेक्लान राइसया गोलं इंग्ल्याण्डं अग्रता काःगु खःसा १८ औं मिनेटय् एज्री कोन्सां अग्रता तब्या याःगु खःसा साकां ३७ व इन्जुरी टाइमया ४६ औं मिनेटय् निगू गोल यायेवं इंग्ल्याण्डं न्हापांगु हाफय् ४ गोलया अग्रता काःगु खः ।
निगूगु हाफय् आक्रामक कासा म्हितूगु साविकया उपविजेता फ्रान्सं लगातार स्वंगू गोल याःगु खः । ४८ औं मिनेटय् कप्तान किलिएन एम्बाप्पें फ्रान्सया निंतिं न्हापांगु गोल याःगु खःसा ब्राडले बारकोला व ६६ औं मिनेटय् एम्बाप्पें गोल यासें कासायात ४–३ या स्थितिइ हःगु खः ।
८७ औं मिनेटय् इंग्ल्याण्डं हाकनं गोलया अग्रता काल । थपालय् शाकां पेनाल्टीइ गोल यासें गोलया दूरी अप्वयेकगु नापं ह्याट्रिक नं याःगु खः । वयां लिपा इन्जुरी टाइमया ९६ औं मिनेटय् उस्मान डेम्बलें गोल यानाः हाकनं गोलया दूरी म्हो याःगु खःसा वयां निगू मिनेट लिपा ९८ औं मिनेटय् जुड बेलिंघमं थप छगू गोल यायेवं इंग्ल्याण्डं कासा ६–४ गोल अन्तरं त्याकाः विश्वकपया स्वंगूगु थासय् वःगु खः ।
सन् १९६६ लय् विश्वकप त्याकूगु इंग्ल्याण्डया निंतिं थ्व वयां लिपाया उत्कृष्ट स्थान खः । सन् २०१८ या विश्वकपय् प्यंगूगु थासय् लाःगु खः ।
मेखे इंग्ल्याण्डलिसे बुनाः प्यंगूगु थासय् लाःगु फ्रान्सया कप्तान एम्बमाप्पें विश्वकपया इतिहासय् दकलय् अप्वः गोल याःम्ह कासामिया कीर्तिमान तःगु दु । एम्बाप्पें विश्वकपय् दकलय् अप्वः २२ गोल यानाः थःगु नामय् कीर्तिमान तःगु खः । एम्बाप्पें अर्जेन्टिनाया कप्तान लियोनल मेस्सीया नामय् दुगु व्यक्तिगत २१ गोलया कीर्तिमान त्वाःथःगु खः । एम्बाप्पें मात्र स्वंगू संस्करणया विश्वकप म्हिताः २२ गोलया कीर्तिमान तःगु खः ।
अथे हे जारी विश्वकपय् नं एम्बाप्पे दकलय् अप्वः गोल याःम्ह कासामिया रुपय् शीर्ष स्थानय् दु । एम्बाप्पें थुगु विश्वकपय् समूह चरणनिसें स्वंगूगु थाय्या निंतिं जूगु कासाय् यानाः मुक्कं १० गू गोल याःगु दु । मेखे अर्जेन्टिनाया कप्तान मेस्सीया नामय् थुगु विश्वकपय् ८ (थ्व समाचार च्वयाच्वनागु ई तकया दुने) गोल दु ।
LEAVE YOUR COMMENTS