डा. केसीपाखें सत्याग्रह

येँ (नेपालभाषा टाइम्स) – वरिष्ठ चिकित्सक गोविन्द केसीं म्हिगः निसें हाकनं सत्याग्रह सुरु याःगु दु। केसीया थ्व १९ क्वःगु सत्याग्रह खः । थौंकन्हय् जुम्ला च्वंच्वनादीम्ह वय्कलं जुम्ला बजाः लिक्क लाःगु सिंहचौरय् च्वंगु बाबिरा मस्ट देगलय् च्वनाः अनसन सुरु याःगु खः । जुम्लाय् च्वनाच्वंम्ह केसीयात सरकारं छुं न्हि न्ह्यवनिसें निगरानी तया वयाच्वंगु खः । वय्कलं थःत थन उखेथुखे जुइत व विरामीया उपचार याकेतकं मबियाच्वंगुलिं जानकारी हे मबिसे सत्याग्रहय् च्वनेमाःगु खँ धयादीगु दु ।

थ्वपालय् वय्कलं थीथी खुगू माग तयाः सत्याग्रहय् च्वनादीगु खः । थुकी वय् कःया प्रमुख माग धयागु कर्णाली स्वास्थ्य विज्ञान प्रतिष्ठानय् तुरुन्त पूर्वाधार व जनशक्ति थ्यंकाः एमबिबिएसलगायतया कार्यक्रम संचालन यायेमाः धयागु दु। अथेहे मास्क तयेगु व सामाजिक दूरी अनिवार्य यानाः लकडाउन चिइकेमाःगु माग नं वय्कःया दु। अथेहे कोरोनाया लिसें मेमेगु ल्वय्या विरामीपिनि नं उचित उपचारया व्यवस्था जुइमाःगु, चिकित्सा शिक्षा ऐन संशोधन यायेमाःगु, त्रिवि चिकित्साशास्त्र अध्ययन संस्थान लिसें फुक्क विश्वविद्यालय, काउन्सिल व प्रतिष्ठानय् पदाधिकारी नियुक्ती निष्पक्ष व पारदर्शी जुइमाःगु, तःधंगु भ्रष्टाचारया दोषीतय्त कानुन कथं कारवाही यायेमाःगु माग वय्कःया दु ।