मेट्रो एफएमया २१ क्वःगु वार्षिकोत्सव

येँ (नेपालभाषा टाइम्स) – येँ महानगरपालिकां न्ह्याका वयाच्वंगु मेट्रो एफएम ९४.६ मेगाहर्ज २१ क्वःगु वार्षिकोत्सव वंगु बुधवाः छगू औपचारिक ज्याझ्वःया दथुइ जुल । कोभिड-१९या संक्रमणयात ध्यानय् तयाः थुगुसी एफएमया वार्षिकोत्सव ‘मेट्रो स्मारिका’ विमोचन जक याःगु खः ।

मूपाहांकथं येँ महानगरपालिकाया प्रमुख विद्यासुन्दर शाक्ययात ब्वनातःगु खःसां वय्कः नकतिनि जक कोभिड संक्रमणमुक्त जुयाः स्वास्थ्य लाभ यानाच्वंगुलिं उपस्थित जुयामदीगु व उपप्रमुख नं स्वास्थ्यलाभ यानाच्वनादीगुलिं विशेष पाहांकथं प्रमुख प्रशासकीय अधिकृत एकनारायण अर्याल विशेष पाहांकथं झायादीगु खः ।

येँ मनपाया प्रवक्तालिसें सूचना प्रविधि समितिया संयोजक १५ वडाअध्यक्ष ईश्वरमान डंगोलया सभापतित्वय् जूगु ज्याझ्वलय् सूचना प्रविधि विभागया प्रमुख नरेन्द्र विलास वज्राचार्यं लसकुस यानादीगु खः । ज्याझ्वलय् नवासें वय्कलं येँ मनपा एफएमया क्षमता विस्तारया निंतिं योजना दयेकाः न्ह्याः वनेत स्वयाच्वंगु जानकारी बियादिल ।

प्रमुख प्रशासकीय अधिकृत अर्यालं स्वनिगःया दक्वं स्थानीय तहया दथुइ संचार साझेदारी यानाः मेट्रो एफएमयात विस्तार यायेगु सोच महानगरं दयेकाच्वंगु दु धासें आः महानगरया गतिविधि महानगरवासीयात जक बीगु मखसे महानगरय् जुयाच्वंगु ज्याया जानकारी मेमेगु जिल्लाय् थ्यंकेगु व मेमेगु जिल्लाबारे महानगरवासीयात जानकारी बीगु कथं न्ह्यायेमाः धयादिल ।

येँ जिल्लाया प्रमुख जिल्ला अधिकारी जनकराज दाहालं येँ जिप्रकाया सार्वजनिक महत्वया सूचना, गतिविधि व जानकारी प्रशारणया निंतिं मेट्रो एफएमनाप सहकार्य यानाः न्ह्याः वनेगु जुइ धयादिल ।