यँयाः पर्वयात मनपाया ग्वाहालि
येँ- न्ह्यःने वयाच्वंगु यँयाः पर्व सञ्चालनय् दुथ्याःगु थीथी पक्षयात येँ महानगरपालिकां थौं आर्थिक अनुदान लःल्हाइगु जूगु दु । यँयाः पर्वय् सहभागी जुइमाःगु सकलें खलः पुचः गुथि जानाः इन्द्रजात्रा व्यव–स्थापन समिति गठन यानातःगु दु । थौं उगु समितियात आर्थिक अनुदान लःल्हायेत्यंगु खः ।
लिसें मनपां कुमारी माजु लिसें गणेश व भैरवपिंत बीगु आर्थिक अनुदान नं थौं हे लःल्हाइगु ग्वसाः दु । थ्वहे झ्वलय् न्ह्यःने वयाच्वंगु भिजिट नेपाल वर्षया लागिं येँ महानगर–पालिकाया विशेष म्हसीका कायम यायेगु कथं लोगो निर्माण यायेत वरिष्ठ कलाकार केके कर्माचार्यया अध्यक्षताय् छगू पुचः नं गठन याःगु दु ।
येँया थीथी थासय् येँ देय्या म्हसीका कायम जुइ कथंया मूर्ति, किपा व मेमेगु आकृति ब्वयेगु ल्याखं थ्व पुचः गठन याःगु खः । थुकी कलाकारपिं सुनिल रञ्जितकार, एकाराम सिंह, धर्मराज शाक्य, शुष्मा राजभण्डारी व मनपा सहरी योजना आयोगया दुजः मन राजा रञ्जित च्वनादीगु दु ।
LEAVE YOUR COMMENTS