ने. सं. ११४३ ञलागा चौथी -

न्हूदँ ११३९ या लसताय् १८ वडा महोत्सव व भिंतुना सनिल

येँ महानगरपालिका वडा नं. १८ ताम्सिपाखाय् थुगुसी न्हापांखुसी नेपाल संवत् ११३९ न्हूदँ क्यनीगु लसताय् सांगीतिक ज्याझ्वःलिसें कला व शीप प्रवद्र्धन यायेगु ताः तयाः ‘१८ वडा महोत्सव’ यायेत्यंगु दु । स्थानीय निकायय् जनप्रतिनिधि वःगु दछि लिपा हे स्थानीय निकायय् आपालं अधिकार कायम जुइधुंकाः थुकथंया महोत्सवया ग्वसाः ग्वयेत्यंगु खः ।

थुकिया लागिं समाजसेवी कथं न्हापांनिसें हे नांजाम्ह येँ मनपा १८ वडाअध्यक्ष भाजु न्हुछेकाजी महर्जनं ज्या याना च्वनादीगु दु । न्हापा न्हापा नं वडा वडाय् नेपाल संवत् न्हूदँया लसताय् तुच्चा ज्याझ्वः, भिंतुना कालबिल ज्याझ्वःलिसें थीथी कथंया सांस्कृतिक ज्याझ्वः सहितया शीप व कलाया प्रदर्शन ज्याझ्वः मजूगु धाःसा मखु ।

येँ मनपा ३० वडा, २८ वडा थेंज्याःगु हनुमानध्वाखा लाय्कू लिक्क लाःगु वडाय् चिनियामान वज्राचार्य, सुभानकुमार श्रेष्ठ थेंज्याःपिं वडाअध्यक्ष व अबलेया मेयर केशव स्थापितया तसकं सतीपिं पासापिसं सितिं वंग वस्तुया थीथी हलंज्वलं दयेकाः ब्वज्या यानाः, देवीप्याखं व चचाप्याखं क्यनाः वडाय् उकथं नेपाल संवत् न्हूदँया लसताय् तुच्चा ज्याझ्वः दँय्दसं यानाच्वंगु नं खः ।

न्हापा न्हापा यानाच्वंगु उकथंया थीथी कथंया सांस्कृतिक ज्याझ्वःयात हे निरन्तरता बीकथं नापं शीप प्रवद्र्धन यायेगु ताः तयाः १८ वडाअध्यक्ष न्हुछेकाजी महर्जनं थुगु महोत्सव यायेगु ग्वसाः ग्वयादीगु खः । धायेबलय् व स्वयेबलय् सीमित छगू वडाया जक महोत्सव थें च्वंसां थुकिं फयांफछि दक्वं वडां थःगु महोत्सवया रुपय् नाले फइकथं सकसितं पाहांकथं ब्वनातःगु दु ।

महोत्सवया तयारीया झ्वलय् पत्रकार सम्मेलन, पत्रपत्रिकाय् समाचार सम्प्रेषण व थीथी प्रचारात्मक ज्याझ्वः नं जुयाच्वंगु दु । ‘संचार ख्यः छगू सशक्त माध्यम खः’ धइगु न्हापांनिसें हे वाःचायेका च्वनादीम्ह वडाअध्यक्ष महर्जनं थ्व इलय् वडाय् १० बजेनिसें ५ बजे तक अझ फुसा व स्वयां अप्वः ई बियाः महोत्सव गुकथं ताःलाकेगु धइगु खँय् जक लगे जुयाच्वनादीगु दु ।

न्हूदँया लसताय् धकाः अथें नं नेपाल संवत् ११३९ न्हूदँ समारोह समितिं बसन्तपू लगायत थीथी थासय् थीथी कथंया हे विशेष ज्याझ्वः ला तयातःगु हे जुल । उकियात हे तीबः जुइकथं व ग्वाहालि यायेकथं वा नेपाल संवत्या लसताय् जुइगु थीथी गतिविधियात अझ तःब्या याना वनेगु ताः तयाः थ्व महोत्सवया ग्वसाः ग्वयेत्यंगु खः ।

वडाअध्यक्ष महर्जनं बियादीगु जानकारी कथं महोत्सवया दिं कात्तिक १७ गते शनिवाःकुन्हु सुथ न्हापां ८ बजे हे भिंतुना कालबिल ज्याझ्वः व तुच्चा ज्याझ्वः जुइ । उकुन्हु १८ वडाया दकलय् चकंगु थाय् बुरांख्यलय् थ्व ज्याझ्वः यायेगु ग्वसाः ग्वयातःगु दु । वडाया जक ज्याझ्वः थें मच्वनेमा धइगु ल्याखं अन धमाधम न्हू कथंया बुरांख्यः निर्माण यायेगु ज्या जुयाच्वंगु दु ।

थज्याःगु ज्याझ्वः वडाय् न्हापांखुसी यायेत्यंगु कारणं नं वडाअध्यक्ष व वडा सदस्यनापं वडाया सकसिगुं ध्यान नं उकथं हे उगु महोत्सवय् केन्द्रीत जुयाच्वंगु दु । भिंतुना कालबिल व तुच्चा ज्याझ्वः सुथसिया ८ बजेनिसें १० बजे तक निघौ जक जुइ । तर अथे खःसां व हे इलय् थीथी वडाया मनूत नाप लायेगु व थीथी कथं सहलह ब्याकेगु ज्या नं जुइ ।

सुथंनिसें हे शीप व कला प्रदर्शन यायेगुकथंया तयारी नं न्ह्यानाच्वंगु दु । उकी १८ वडान्यंकंया थीथी गुथि, मिसा पुचः, व्यापारी नापं खलः पुचःपाखें थःपिनि शीप व कला प्रदर्शन याइगु जुयाच्वंगु दु । उगु ब्वज्या सुथंनिसें बहनीथ्यंकं न्ह्याइ । थ्वहे झ्वलय् वडा ज्याकुथिइ १० निसें २ बजे तक निःशुल्क स्वास्थ्य शिविर संचालन जुइ ।

वडा ज्याकुथिइ हे निःशुल्क आयुर्वेदिक औषधालय कक्ष संचालन याना वयाच्वंगु महोत्सवय् निःशुल्क स्वास्थ्य शिविरय् आयुर्वेदिक चिकित्सालयपाखें ग्वाहालि कयाः यायेत्यंगु खः । वंगु दँय् थज्याःगु हे थीथी कथंया शीपमूलक तालिम काःपिं वडाया गृहिणीनापं तालिमय् सहभागी प्रशिक्षार्थीतय्पाखें हे उगु ब्वज्या यायेत्यंगु दु ।

ब्वज्याय् मखमलया लाकां सुइगु, कापःया फूलदानी तयार यायेगु, जाम, अचार, झोला दयेकेगुलिसें थीथी नसाज्वलं सवाः नं काये फइ । नेवाः नसाज्वलंया ब्वज्या व सवाः कायेगु ज्या नं न्ह्यानाच्वनी । थुगु ब्वज्या सुथंनिसें बहनिथ्यंकं न्ह्यानाच्वनीगु वडाअध्यक्ष महर्जनं ‘नेपालभाषा टाइम्स’यात कनादिल ।

महोत्सवय् न्हिनसिया २ ताःइलंनिसें निशा देसार, अनिल शाही, माणिक शाही, पूर्णकाजी ज्यापु, पवित्र कसाः लगायत नांजाःपिं कलाकारतय् सांस्कृतिक ज्याझ्वः नापं समय्बजि पुचलं ख्यालः न्ह्यब्वइ । सांस्कृतिक ब्वज्या आधुनिक व परम्परागत निगूकथंया दइ । सांस्कृतिकपाखे थीथी त्वाः, गुथि, खलःपाखें परम्परागत बाजं सयेका च्वंपिं व स्यनाच्वंपिं गुरु व शिष्य जानाः प्रस्तुति न्ह्यब्वइगु जुयाच्वंगु दु ।

थुकी १८ वडाय् च्वंगु ताम्सिपाखा सामुदायिक अध्ययन केन्द्र नापं पुष्पलाल स्मृति केन्द्र, स्थानीय त्वाः खलः, गुथि, मिसा पुचः व थीथी संघ संस्थाया ल्याय्म्हपिं तयार जुयाच्वंगु दु ।महोत्सवया हे झ्वलय् वडान्यंकं सफाइ अभियान, जनचेतनामुलक नाटक क्यनेगु, बुरांख्यः पार्कया ल्ह्वनेज्या यानाः ब्लकं सीगु ज्या न्ह्यानाच्वंगु दु ।

थुकिया नापनापं महोत्सवयात छगू नमूना महोत्सव कथं संचालन यायेगु ताःतयाः आवश्यक तयारी जुयाच्वंगु वडाअध्यक्ष महर्जन कनादिल । थुकथं न्ह्यायेत्यंगु ‘१८ वडा महोत्सव’ स्वन्ति न्ह्यःया शनिवाः (कात्तिक १७) कुन्हु जुइत्यंगु दुसा ज्याझ्वःलय् मूपाहांकथं महिला, बालबालिका तथा ज्येष्ठ नागरिकमन्त्री थममाया थापायात ब्वनातःगु दु ।