टिचिङ अस्पतालया चिकित्सकतय्त दाःगु घटनाय् डिएसपीयात प्रमुख पदं चीकल

येँ– ड्युटी वनावंपिं चिकित्सकतय्त प्रहरीं दाःगु घटनाय् महाराजगञ्जन प्रहरी वृत्तया प्रमुख डिएसपी उमेश लम्सालयात वृत्तया प्रमुखया जिम्मेवारी चिइकाः महानगरीय प्रहरी कार्यालय रानीपोखरी सालाकाःगु दु ।

डिएसपी लम्सालया नेतृत्वय् दुगु प्रहरीं पुचलं म्हिगः शिक्षण अस्पताल महाराजगञ्जया स्वम्ह चिकित्सकतय्त ड्युटी क्वचायेकाः जा नयाः लिहां वनाच्वंगु इलय् दाःगु खः । चिकित्सकपिं शम्भु खनाल, तेजप्रकाश शाह व विकास शाहयात दाःगु घटनायात कयाः छानविन यायेगु नि.तिं महानगरीय प्रहरी कार्यालयं एसएसपी किरण वज्राचार्यया संयोजकत्वय् एसपी मुकेश सिंह व डिएसपि होबिन्द्र बोगटी दुजः दुगु छगू छानविन समिति नं गठन यानागु खँ धाःगु दु ।

प्रहरी कार्यालयं छगू विज्ञप्ति पितबिसें थ्व घटनाय् संलग्न मेपिं प्रहरीयात नं मेट्रो प्रहरी रानीपोखरी झिके यानाः छानविन न्ह्यायेधुंकूगु खँ धाःगु दु । लिसें थ्व घटनाय् कार्यालयं दुःख नं प्वंकूगु दु ।