तोखा व गोदावरी आकस्मिक हिदान, कन्हय् ग्वंगःबुँइ

येँ – लकडाउनया कारणं हिया अभाव जुइके मबिइगु ताः तयाः जुयाच्वंगु डोर टु डोर हिदान ज्याझ्वःया झ्वलय् थौं शनिवाः टोखाय् हिदान जुल । टोखा नगरपालिका झोरय् च्वंगु पब्लिक इंग्लिस बोर्डिङ स्कूलय् जूगु हिदान ज्याझ्वलय् ३६ म्हेसिनं हिदान याःगु खः ।

ब्लड डोनर्स एशोसियसन नेपालया आह्वानय् जूगु उगु ज्याझ्वलय् झोर नगरपालिकाया थीथी वडाया अध्यक्षपिं, ब्लोडानया केन्द्रीय दुजःपिं विनोद तुलाधर, पुरुषोत्तम खत्री, ब्लोडान येँ जिल्ला सचिव व ज्याझ्वःया संयोजक अनिलरत्न तुलाधर लिसें ब्लोडानया थीथी पदाधिकारीपिनि उपस्थिति दुगु खः ।

अथेहे ब्लोडान यलया ग्वसालय् गोदावरीया ताहाखेल सिमलटारय् नं म्हिगः हिदान ज्याझ्वः जुल । ज्याझ्वलय् ४१ म्हेसिनं हिदान याःगु खः । थुगु हिदान ज्याझ्वलय् गोदावरी नगरपालिकाया मेयर गजेन्द्र महर्जन, उपमेयर मुना अधिकारीपिं लिसें थीथी वडाया अध्यक्षपिं व ब्लोडान यलया पदाधिकारीपिनि उपस्थिति दुगु खः ।

डोर टु डोर हिदानया झ्वलय् कन्हय् आइतवाः ग्वंगःबुँया बसपार्क लिक्क धानेश्वर देगलय् हिदान ज्याझ्वः जुइत्यंगु दु । स्थानीय कम्युनिटी सेवा केन्द्र व कम्युनिटी पुलिस सेवा केन्द्रया ग्वसालय् जुइगु हिदान सुथय् १० बजे निसें न्ह्याइगु खँ धाःगु दु ।