मचायात गलत खाेप बीगु कान्ति बाल अस्पतालयात ३० लाख क्षतिपूर्ति पुलेत अादेश

येँ (नेपालभाषा टाइम्स)- कान्ति बाल अस्पतालं छम्ह मचायात गलत खोप बियाः चिकित्सकीय लापरबाही याःगु मुद्दाय् सर्वोच्च अदालतं ३० लाख तका क्षतिपूर्ति बीत आदेश बिउगु दु । न्यायाधीश हरिप्रसाद फुयाँल व तीलप्रसाद श्रेष्ठया मंकाः इजलासं उगु आदेश बिउगु खः ।

घःपतय् समस्या जुयाः कान्ती बाल अस्पतालया इमर्जेन्सीइ वासः याकेत वम्ह च्याला दुम्ह मचा आलोक बरालयात गलत सुइ बिउगुलिं क्षति जूगु धासें उगु ध्यबा पुलेत आदेश बिउगु खः । पीडित मचाया अबु ध्रुवकुमार विश्वकर्मां मेम्ह मचाया नितिं तयार याःगु ‘मेनेन्जाइटिस मलेरिया’ या खोप थः मचायात बिउगुलिं मचाया स्वास्थ्यय् क्षति जूगु धासें मुद्दा तःगु खः ।

२०७३ साल असार २२ गते मचायात वासः यायेत कान्ति अस्पतालया इमर्जेन्सीइ यंकूगु खःसा वकुन्हु चान्हय् नर्स मेम्ह मचाया नितिं तयारी यानातःगु मेनेन्जाइटिस मलेरिया खोप मचायात बिउगु खः । वयां लिपा बचायात सासः ल्हायेत थाकुइगु, खि च्व ज्वइगु लक्षण खनेदुगु खः ।

मचाया स्वास्थ्य स्यनेवं स्वास्थ्यकर्मीपिसं मचायात अन्तर्राष्ट्रिय बाल मैत्री अस्पतालय् रिफर याःगु खःसा मचायात नीच्यान्हु तक भेन्टिलेटरय् तयाः वासः याःगु खः । वयां झिंच्याला लिपा मचाया तुति चले मजूगु, न्हाय्पं मताइगु, मिखाया नसा गनाः वनाः मिखां मखनेगु समस्या खनेदुगु खः ।

सर्वोच्च अदालतं बिउगु आदेशय् धयातःगु दु, ‘अस्पतालं याःगु लापबाहीं मचा व छेँजःपिसं फयेमाःगु आर्थिक, समाजिक, शारीरिक आदि क्षतिया विश्लेषण यानाः क्षतिपूर्ति बीमाःगु खनेदत ।

थुकथं शारीरिक व मानसिक अशक्त जुम्ह आलोक बरालया सामान्य जीवन जुइ मफयाः आजीवन मेपिनिगु साहाराय् जीवन हनेमाःगु खनेदत । मचाया स्वास्थ्य उपचारय् जूगु खर्च, फयेमाःगु पीडा व कष्ट व्यक्तिया आय आर्जन यायेगु क्षमताय् वःगु म्होतिं भविष्यय् उपचार याकेत माःगु अनुमानित खर्च लिसे वासः यायेगु खर्च थेंज्याःगु खँयात ध्यानय् तयाः माक्व क्षतिपूर्ति बीमाःगु खनेदु ।