सार्वजनिक यातायात : सजायया यात्रा

येँ – यातायात व्यवस्था विभागं थगुनेया मापदण्ड कथं यातायात क्षेत्रया सुधार यायेमफुगु खँ उपभोक्ता मञ्चया केन्द्रीय दुजः रोशन पोखरेलं धयादीगु दु । यातायातय् सिन्डिकेट त्वाःदल धाःसां अझं न्हूपिं व्यवसायीतय्सं सवारी साधन तयेफुगु अवस्था मदुगु खँ वय्कलं धयादीगु दु ।

‘माइक्रोय् झिंस्वम्ह स्वयां अप्वः यात्रु तयेथाय् दइमखु, तर परिचालकं लिउनें सिट तयाः प्यम्ह, निम्ह च्वनेगु सिटय् स्वम्ह तयाः न्हय्म्ह यात्रु थप याइ, उकिसनं वक्कसित थनाः तयायंकी, अथे जूसं विभागं अनुमान यागु मदु । थुकिया कारणं दुर्घटना नं जुयाच्वंगु दु’ वय्कलं धयादीगु दु ।

सवारी तथा यातायात व्यवस्था ऐन २०४९ य् दुगु व्यवस्था कार्यान्वयन जुइमफुगुलिं नं यात्रुतय् सास्ती नयेत बाध्य जुयाच्वंगु दु । सार्वजनिक यातायातय् यात्रा यायेगु धयागु सजाय फयाच्वनागु थें जूगु खँ छम्ह यात्री शर्मिला न्यौपानें धयादिल ।ऐनया व्यवस्था कथं यातायात निरीक्षक नियुक्त यानाः सार्वजनिक यातायातया अनुगमन यायेगु ज्या न्ह्याके फयाच्वंगु मदु ।

सार्वजनिक यातायातय् यात्रा याइपिंत टिकट बीमाःगु व्यवस्था नं अप्वः भाडा काये मखनीगु जूगुलिं परिचालकतय्सं कार्यान्वयन यानामच्वंगु खँ उपभोक्ता मञ्चया दुजः पोखरेलं कनादिल ।सरकारी संस्थाया नं शेयर दुगु साझा यातायातं जक थौंकन्हय् यात्रुतय्त टिकट बीगु यानाच्वंगु दु ।

टिकट बीगु व्यवस्था यातधाःसा यातायात व्यवसायीतय्त नं आयआर्जनया हिसाबकिताब तयेत अःपुइगु जूसां कर अप्वः पुलेमाली धकाः थज्याःगु व्यवस्था कार्यान्वयन जुयामच्वंगु खँ उपभोक्तावादीतय्सं धायेगु यानाच्वंगु दु ।

थगुने वःगु मापदण्डं यातायात क्षेत्रय् दुगु विकृति चिलावनीगु विश्वास याःगु खःसां थुकिया कार्यान्वयनय् प्रगति मजुइवं यातायात क्षेत्रया समस्या झन तच्वया वनाच्वंगु दु । सार्वजनिक यातायात व्यवस्थित जुइमफुगुलिं मोटरसाइकल, कार थेंज्याःगु सवारी साधनया आयात झन झन अप्वया वनाच्वंगु दु ।

सम्बन्धित बुखँ

LEAVE YOUR COMMENTS