भ्वतय् नेपालभाषा ब्वंकेगु बारे सहलह

भ्वत (नेपालभाषा टाइम्स) – भ्वतय् नं नेपालभाषाया माध्यमं स्थानीय पाठ्यक्रम ब्वंकेगु खँयात कयाः म्हिगः भ्वतया स्थानीय भाषिक कार्यकर्ता व येँया भाषिक अभियन्तातय् दथुइ खँल्हाबल्हा जुल । भ्वतया नेवाः गुथि समाजया ग्वसालय् जूगु उगु खँल्हाबल्हाय् येँ महानगरपालिकाय् स्थानीय विषयया पाठ्यक्रम दयेकादीपिं डा. चुन्दा वज्राचार्य, वरुणप्रसाद वैद्यपिंसं नं ब्वति कयादीगु खः ।

खँल्हाबल्हाय् जानकारी बिउ कथं बनेपा नगरपालिकां आः १ तगिंनिसें ३ तगिं तक नेपालभाषाया माध्यमं स्थानीय पाठ्यक्रम ब्वंकेगु जुइ धकाः मौखिक सहमति जूगु दु। तर उकिया लागिं पाठ्यक्रम धाःसा तयार मजूनि । ज्याझ्वलय् थःगु बिचाः तयादिसें डा. चुन्दा वज्राचार्यं बनेपाय् ३ तगिं तक जक मखु, ८ तगिं तक हे नेपालभाषाया माध्यमं स्थानीय पाठ्यक्रम ब्वंकेमाःगु खँ तयादिल । लिसें वय्कलं पाठ्यक्रम तयार याये माःसा थःपिंसं ग्वाहालि यायेगु बचं नं बियादिल ।

अथे हे वरुणप्रसाद वैद्यं नेपालभाषां ब्वंकीपिं शिक्षकतय्त तालिम बी माःसा थःपिंसं माक्व यायेगु खँ कनादिल । अथे हे नेवाः वस्ती नेवाः स्कूल अभियानया दीपक तुलाधरं आवश्यक जुल धाःसा छगू तगिंनिसें क्वय्या तगिमय् तकं नेवाः भाय् ब्वंका यंकेमाःगु बिचाः नं तयादिल । सहलहय् येँनं झाःपिं उमेश स्थापित व सुरेश किरणपिंसं नं नुगःखँ तयादीगु खः ।

ज्याझ्वलय् नेवाः गुथि समाजया नायः लिसें मोहनिपा पुचःया दुजः प्रदीप मानन्धरं भ्वतय् स्थानीय पाठ्यक्रम तयेगु सहमति लिपा उकिया तयारी व कार्यान्वयन यायेत आवश्यक सल्लाह बियादीत इनाप यानादिल । ज्याझ्वलय् समाजया सल्लाहकार दिलीप श्रेष्ठ लिसें दुजःपिं साजेत शाक्य, राजन शाक्यपिंसं नं न्ववानादीगु खः ।

अथे हे भ्वतया भाषिक अभियन्तापिं मोहन दुवाल, राजाराम धौभडेल, हरिशंखर मानन्धरपिंसं नं थःगु बिचाः तसें भ्वतय् गैर नेवाःतय् बसोवास अप्वया वनाच्वंगु कारणं नेपालभाषा अनिवार्य रुपं ब्वंकेमाःगु खँ कनादिल ।

सम्बन्धित बुखँ

LEAVE YOUR COMMENTS