धुकूपिकू क्यने छंत बोलया म्युजिक भिडियो पिदन

येँ- नांजाःम्ह निर्देशक पवन जोशीया निर्देशनय् नेपालभाषाया न्हूगु म्येँ ‘धुकूपिकू क्यने छंत ….’ बोलया म्युजिक भिडियो पिहां वःगु दु । जनगायक भृगुराम श्रेष्ठं छगू ज्याझ्वःया दथुइ उगु म्युजिक भिडियो सार्वजनिक यानादीगु खः ।

ज्याझ्वलय् मूपाहां जनगायक श्रेष्ठं थःगु नुगःखँ कनादिसें पुलांगु ईया लुमन्ति इनादीगु खःसा नेपालभाषा सांगीतिक ख्यःया श्रीवृद्धिया निंतिं थःत पानाच्वंपिंत सफलताया कामना नं यानादिल ।

ज्याझ्वलय् नांजाःम्ह म्येँ हालामि प्रवेशमान शाक्य, सिने पत्रकार विजयरत्न असंबरेलिसें म्युजिक भिडियोया कलाकार, म्येँ हालामि, च्वमि, संगीतकःमि व प्राविधिकपिंसं नं म्युजिक भिडियोया थीथी पक्षयात कयाः थःथःगु नुगःखँ प्वंकादीगु खः ।

विकासरत्न कंसाकारं च्वयादीगु अनिल तुलाधरं लसय् हनादीगु खःसा ताराराम मुनकःमिं सः बियादीगु उगु म्येँया म्युजिक भिडियोय् लोकंह्वाःम्ह कलाकार रुपेन्द्र श्रेष्ठ ‘थक्वाःमि’ व आराध्यलक्ष्मी खड्गीया मू अभिनय दु ।

म्युजिक भिडियोया छायाँकन व सम्पादन सोहन मानन्धरं यानादीगु खः ।