कोरोना संक्रमितत झिगू लाख स्वयां अप्वल

यँ– विश्वन्यंकं कोरोना भाइरसं संक्रमण जूपिनि ल्याः झिगू ल्याखं पार याःगु दु । जोन हप्किन्स विश्वविद्यालयं झिगू लाखं मल्याक मनूतय्त कोरोना संक्रमण पुष्टि जुइधुंकूगु खँ धाःगु दु ।

कोरोना संक्रमिततय् तथ्यांक बिया वयाच्वंगु वर्डोमिटर डट इन्फोया कथं शुक्रवाः न्हिनय् १२ बजे कोरोना संक्रमित जूपिनि ल्याः १० लाख १६ हजार ४१३ म्ह थ्यंगु दुसा सीपिनि ल्याः ५२ हजार २३८ थ्यंगु दु । अथेहे संक्रमितत मध्ये २ लाख १३ हजार १३४ म्ह स्वस्थ जुयाः लिहां वनेधुंकूगु दुसा ७ लाख ५० हजार ४१ म्हं अझं उपचार याकाच्वंगु दनि ।

संक्रमितत मध्ये दकलय् अप्वः अमेरिकाय् दुसा सीपिं दकलय् अप्वः इटलीइ दु । मुक्कं संक्रमितत मध्ये प्यब्वय् छब्वः अमेरिकाय् जक दुसा बछि युरोपय् दु । वर्डोमिटरया कथं अमेरिकाय् संक्रमिततय् ल्याः २ लाख ४५ हजार ३७३ थ्यंगु दुसा थन सीपिं ६ हजार ९५ म्ह थ्यंगु दु ।

अथेहे इटलीइ संक्रमिततय् ल्याः १ लाख १५ हजार २४२ म्ह थ्यंगु दुसा सीपिं १३ हजार ९१५ थ्यंगु दु । अथेहे स्पेनय् संक्रमितत १ लाख १२ हजार ६५ म्ह थ्यंगु दुसा सीपिं १० हजार ३४८ म्ह थ्यंगु दु । बिहिवाः स्पेनय् २४ घन्टाया दुने ९५० म्हेसिया ज्यान वंगु खः ।

छुं नं देशय् कोरोना संक्रमणं छन्हुं सीगु थ्व आःतकया दकलय् अप्वः ल्याः खः । स्पेनय् बुधवाः छन्हुं हे ८ प्रतिशतया ल्याखं संक्रमितत अप्वःगु खः ।

नेपालय् आःतक खुम्हेसिके कोरोना संक्रमण लुइकूगु दुसा छम्ह उपचार यानाः छेँय् लिहां वनेधुंकूगु दु । मेपिं न्याम्ह उपचारय् दु ।