ने. सं. ११४४ कौलाथ्व दुतिया -

चीनं थःपिनिगु अन्तरिक्ष स्टेसनय् अन्तरिक्षयात्री छ्वल

एजेन्सी- चीनं बिहिवाः थःपिनिगु अन्तरिक्ष स्टेसनय् स्वम्ह अन्तरिक्षयात्री छ्वःगु दु । चीनं नी हेशेङ, लियु बोमिङ व टेङ होङबोयात थःपिनिगु न्हूगु अन्तरिक्ष स्टेसनय् स्वलाया निंतिं छ्वःगु खः । बिहिवाः चीनं लङ मार्च २ एफ रकेटया च्वकाय् च्वंगु शेनझोउ–१२ नांयागु रकेट अन्तरिक्षय् छ्वःगु खः ।

बेइजिङया स्थानीय ई कथं सुथसिया ९ः२२ बजे गोबी मरुभूमिइ च्वंगु भूउपग्रह प्रक्षेपण केन्द्रं रकेट प्रक्षेपण याःगु खः । चीनयागु अन्तरिक्ष स्टेसन पृथ्वीया सतहसिबें ३८० किलोमिटर तजाःथाय् दु । चीनं अन्तरिक्षय् छ्वःगु थ्व आतकया हे दकलय् तग्वःगु मानवयुक्त अन्तरिक्ष यान खः । चीनं अन्तरिक्षय् स्वला तक अनुसन्धान याइ ।

नीया नेतृत्वय् दुगु थ्व मिशनया मू आज्जु २२.५ टन चिनियाँ अन्तरिक्ष स्टेसन सक्रिय यायेगु खः । नीं अन्तरिक्षय् न्हूगु छेँ दयेकेमाःगु व न्हूगु प्रविधिया परीक्षण यायेमाः धाःगु दु । नीं स्वम्ह जानाः बांलाक ज्या यानाः अन वइगु हाथ्यायात हाचां गाया वइगु विश्वास दुु धाःगु दु । नीं मिशन सफल जुइगुलिइ थःत पत्याः दु धाःगु दु । चीनं याःगु थ्व ज्यां चीनया अन्तरिक्ष क्षमता बांलाना वःगु खनेदु ।

वंगु खुलाया दुने चीनं चन्द्रमाया सतहं ल्वहं व चायागु नमुना हःगु खःसा मंगल ग्रहय् रोबोट अवतरण यायेधुंकूगु दु । थ्व निगुलिं ज्या तसकं थाकुगु खःसां चीन थुकी सफल जूगु दु ।