मनूतय्के परीक्षणया चरणय् थ्यंगु कारोनाया खुगू भ्याक्सिन
बिबिसी – कोरोना भाइरस संक्रमण पनेत विश्वन्यंकंया वैज्ञानिकत भ्याक्सिन (खोप) तयार यायेगु निंतिं तसकं मेहनत यानाच्वंगु दु । विशेषज्ञतय् धापू कथं गुगु गतिं कोरोनाया खोपया निंतिं रिसर्च जुयाच्वंगु दु व असाधारण धायेमाः ।
छुं नं भ्याक्सिन विकासया निंतिं दँ दँ ई काइ, गुबलें गुबलें ला दशकौं तक नं ई काइ । उदाहरणया निंतिं धाये इबोलाया भ्याक्सिान । थ्व भ्यासिन विकाया निंतिं झिंखुदँ बित ।
मेगु छगू खँ छु धाःसा भ्याक्सिन (खोप)या विकासया प्रक्रिया तःगू चरण जुयाः न्ह्याःवनी । न्हापांगु चरणया ज्या ल्याबरोटरी जुइ, वयां लिपा जनावरतय्त परीक्षण जुइ । थ्व झ्वलय् यदि भ्याक्सिनया छ्यलाबुला सुरक्षित खनेदत धाःसा व प्रतिरोधक क्षमता खनेदत धाःसा मनूतय्त परीक्षण सुरु याइ ।
आःया बांलाःगु खबर छु धाःसा मुक्कं स्वलाया दुने कोभिड १९ या भ्याक्सिन दयेकेत ज्या यानाच्वंगु ९० गू रिसर्च टिम मध्ये खुगू टिम मनूतय्त परीक्षण यायेगु चरणय् थ्यनेधुंकूगु दु । आः थुपिं खुगू रिसर्च टिमं विकास यानाच्वंगु भ्याक्सिन बारे थुइकेगु कुतः याये –
mRNA-1273 भ्याक्सिन
मोडर्ना थेराप्युटिक्स छगू अमेरिकी बायोटेक्नोलोजी कम्पनी खः, गुकीया मू ज्याकू म्यासाचुसेट्सय् दु । थ्व कम्पनीं कोभिड १९ या भ्याक्सिन विकासया निंतिं न्हूगु रिसर्च रणनीति कथं ज्या यानाच्वंगु दु । थ्व कम्पनीया लक्ष्य थज्याःगु भ्याक्सिन तयार यायेगु खः, गुकिं मनूया प्रतिरोधक क्षमतायात ट्रेन याइ ताकि गुकिं कोरोना भाइरस विरुद्ध ल्वाइ, अले ल्वचं बचे याइ ।
थुकिया निंतिं गुगु पारम्परिक तरिका नालीगु खः, उकी जीवित तर कमजोर व निष्क्रिय विषाणुया छ्यलाबुला याइगु । तर मोडर्ना थेराप्युटिक्सया mRNA-1273 भ्याक्सिनय् अज्याःगु विषाणुया छ्यलाबुला याःगु मदु, गुगु कोभिड १९ महामारीया निंतिं जिम्मेवार खः । थुकिया परीक्षणया निंतिं अमेरिकाया नेशनल इन्ष्टिच्यूट अफ हेल्थपाखें ध्यबाया ग्वाहालि चूलानाच्वंगु दु । थ्व भ्याक्सिन मेसेन्जर च्ल्ब् वा मेसेन्जर राइबोन्यूक्लिक एसिडय् आधारित खः ।
वैज्ञानिकतय्सं ल्याबय् हे कोरोना भाइरसया जेनेटिक कोड तयार याःगु दु, उकिया चिधंगु ब्वयात मनूया म्हय् इन्जेक्सन पाखें बी । वैज्ञानिकतय् आशा दु कि थथे यायेबलय् मनूया प्रतिरोधक क्षमता संक्रमणविरुद्ध ल्वायेत प्रतिक्रिया क्यनी ।
INO-4800 भ्याक्सिन
अमेरिकी बोयोटेक्नोलोजी कम्पनी इनोभियो फर्मास्युटिकल्सया मू ज्याकू पेन्सिल्भेनियाय् दु । इनोवियों थःगु रिसर्चय् न्हूगु रणनीति नालाच्वंगु दु ।
कम्पनीया ध्यान थज्याःगु भ्याक्सिन तयार यायेगु पाखे वनाच्वंगु गुकी ल्वगिया सेल्स (कोशिका)य् प्लाज्मिड (छगू कथंया चिधंगु आनुवंशिक संरचना) पाखें तप्यंक डिएनएय् इन्जेक्ट याइ । थुकिं ल्वगिया म्हय् संक्रमणलिसे ल्वायेगु निंतिं एन्टिबडीया निर्माण सुरु जुइगु आशा यानातःगु दु ।
इनोभियो व मोडर्ना निगुलिं कम्पनीं न्हूगु प्रविधिया ग्वाहालि कयाच्वंगु दु, गुकी छगू आनुवंशिक संरचनाय् हिउपा हयेगु वा उकी सुधार यायेगु ज्या याइ ।
चीनय् जुयाच्वंगु रिसर्च
चीनय् थ्व इलय् स्वंगू भ्याक्सिन रिसर्च मनूतय्त परीक्षण यायेगु चरणय् थ्यनेधुंकूगु दु । थुपिं उत्पादनय् धाःसा पारम्परिक तरिका हे छ्यलाच्वंगु दु ।
AD5-nCoV भ्याक्सिन
वंगु १६ मार्चय् गुबलय् मोडर्ना थेराप्युटिक्सं मनूतय्त भ्याक्सिनया परीक्षण सुरु याःगु खः, उकुन्हु हे चिनिया बायोटेक कम्पनी कैन्सिनो बायोलोजिक्सं नं मनूतय्त परीक्षण सुरु याःगु दु ।
थ्व प्रोजेक्टय् कैंसिनो बायोलोजिक्सया लिसें इन्ष्टिच्यूट अफ बायोटेक्नोलोजी व चाइनिज एकेडमी अफ मिलिट्री मेडिकल साइन्सेजं नापं च्वनाः ज्या यानाच्वंगु दु ।
AD5-nCoV भ्याक्सिनय् एडेनोभाइरसया छगू विशेष भर्सनया छ्यलाबुला भेक्टरया कथं याइ । एडेनोभाइरस विषाणुतय् अज्याःगु पुचःयात धाइ, गुगु झीगु मिखा, श्वासनली, स्वँ, आन्द्रा, नर्भस सिस्टमय् जुइगु संक्रमणया कारण जुइ । थुकिया सामान्य लक्षण ज्वर वइगु, सेखं चाइगु, कथु स्याइगु, डायरिया जुइगु व मिखा ह्याउँया वइगु खः । थ्व भेक्टरया मतलब भाइरस वा एजेन्टलिसे दु, गुकिया छ्यला छुं कोशिकाय् डिएनए थ्यंकेगु निंतिं याइगु खः ।
वैज्ञानिकतय् आशा दु कि थ्व भेक्टरं अज्याःगु प्रोटिनयात सक्रिय यानाबी, गुगु संक्रमणलिसे ल्वायेत प्रतिरोधक क्षमताया निंतिं ग्वाहालि जुइ ।
LV-SMENP-DC भ्याक्सिन
चीनया हे सेन्जेन जीनोइम्यून मेडिकल इन्ष्टिच्यूटय् थ्व भ्याक्सिन मनूतय्त परीक्षण यानाच्वंगु दु । थुकी एचआइभी थेंज्याःगु ल्वय्या निंतिं जिम्मेवार लेन्टिभाइरसं तयार याःगु अज्याःगु सहायक कोशिकाया छ्यलाबुला याःगु दु, गुकिं प्रतिरोधक क्षमतायात सक्रिय याइ ।
वुहानय् दयेकाच्वंगु भ्याक्सिन
चीनय् तयार जुयाच्वंगु स्वंगूगु भ्याक्सिनय् निष्क्रिय भाइरसया भ्याक्सिन बीगु प्रस्ताव यानातःगु दु । थ्व सम्बन्धी रिसर्चया ज्या वुहान बायोलोजिकल प्रोडक्टस इन्ष्टिच्यूटय् जुयाच्वंगु दु । थ्व भ्याक्सिया निंतिं निष्क्रिय भाइरसय् छुं अज्याःगु हिउपाः हइ, गुकिं यानाः सुयातं विरामी दयेकाबीगु क्षमता हे मदयेकाबी ।
जर्मनीया म्याग्डेबर्गय् म्याक्स प्लेंक इन्ष्टिच्यूटया बायोप्रोसेस इन्जिनियरिंग गु्रपया विशेषज्ञ डा. फेलिपे टापियांया कथं थ्व भ्याक्सिन तयार यायेगु दकलय् सामान्य प्रविधि खः । अप्वः थें भ्याक्सिन थ्व हे प्रक्रियां तयार याइ ।
थुकिं स्वीकृति कायेगु निंतिं अप्वः पंगः वइमखु । उकिं वइगु झिंनिला निसें झिंखुला तकया दुने छुं भ्याक्सिन तयार जुइसा व थ्व हे प्रविधिइ आधारित जुइ ।
ChAdOx1 भ्याक्सिन
बेलायतया अक्सफर्ड विश्वविद्यालयया के जेनर इन्ष्टिच्यूटय् ChAdOx1 भ्याक्सिनया विकासया निंतिं ज्या जुयाच्वंगु दु । वंगु २३ अप्रिलय् युरोपय् थुकिया न्हापांगु क्लिनिकल ट्रायल सुरु जूगु दु ।
जेनर इन्ष्टिच्यूटया वैज्ञानिकतय्सं अज्याःगु प्रविधि पाखें ज्या यानाच्वंगु दु, गुगु चिनिया कम्पनी कैंसिनो बायोलोजिक्स रिसर्चं यानाच्वंगु खः । तर अक्सफर्डया रिसर्च टिमं चिम्पांजीपाखें काःगु एडेनोभाइरसया कमजोर भर्सनया छ्यलाबुला यानाच्वंगु दु । थुकी छुं अज्याःगु हिउपाः हःगु दु, गुकिं मनूतय्स म्हय् थ्वं थःथःम्हं छुं विकास मयायेमा ।
वैज्ञानिकतय्सं न्हापा नं थज्याःगु प्रविधि छ्यलेधुंकूगु दु । थुकिया ग्वाहालिं मर्स कोरोना भाइरसया भ्याक्सिन विकसित याःगु खः । थ्व भ्याक्सिनया क्लिनिकल ट्रायल्सय् सकारात्मक लिच्वः वःगु खँ नं पिहां वःगु दु ।
हाथ्या
कोभिड १९ या भ्याक्सिन मालेगु निंतिं युद्धस्तरं ज्या यानाच्वंगु दुसा विज्ञतय्सं थुपिं छुं नं खोपं ज्या हे याइ धयागु ग्यारेन्टि मदुगु खँ धाःगु दु । डा. फेलिपे टापियां धाःगु दु, ‘आःतक सुनां नं थ्व भ्याक्सिनपाखें अप्रत्यासित रुपं गज्याःगु लिच्वः क्यनी धकाः धायेफुगु मदुनि । अलग अलग थासय् अलग अलग उमेरयापिंत थ्व भ्याक्सिनं छु लिच्वः लाकी धयागु सीमदुनि । थ्व ला ई लिसें बुलुहुं सिया वइ ।’
LEAVE YOUR COMMENTS