ने. सं. ११४४ कौलाथ्व पारू - नःलास्वनेगु

मिस स्टार युनिभर्सया उपाधि सृष्टि महर्जनयात

येँ(नेपालभाषा टाइम्स)- दुबईलय् जूगु अन्तर्राष्ट्रिय सौन्दर्र्य प्रतियोगिता ‘मिस स्टार युनिभर्स–२०२३’या उपाधी नेपाःया सृष्टि महर्जनं त्याकादीगु दु । विश्वया झिंगुंगू देय्या कासामिपिंसं ब्वति काःगु सौन्दर्य प्रतियोगिताय् २२ दँया महर्जनं त्याकादीगु खः ।

नेपाः डान्स एकेदमिया डाक्स इन्स्ट्रक्टर्ड महर्जनं शीर्ष उपाधीलिसें ‘मिस गर्जियस’ व ‘मिस प्राइड अफ स्टार युनिभर्स’ सबटाइटल उपाधी नं ल्हातय् लाकादीगु खः ।

‘इन्डो इन्टरनेशनल फेसन कार्निभल एण्ड अवार्ड–२०२३’ अन्तर्र्गत जूगु सौन्दर्य प्रतियोगिता ‘मिस स्टार युनिभर्स–२०२३’या ताजसहितया उपाधी ग्रिनआर्ट मिडियां छ्वया हःगु खः ।

उगु हे ज्याझ्वलय् ‘मिसेस स्टार युनिभर्स–२०२३’य् नेपाःया जोया बुढाथोकीं ‘मिसेज ब्युटिफुल बडी’या उपाधी व अवार्डय् सहभागि फेसन मेकअप आर्टिस्ट रश्मि श्रेष्ठ व व्यवसायी परिन्दा श्रेष्ठं नं थःथःगु विधाय् अवार्ड ल्हातय् लाकेत ताःलाःगु दु ।

उपाधी विजेता महर्जनं थः तसकं लय्ताःगु व अन्तर्राष्ट्रिय ख्यलय् नेपाःया प्रतिनिधित्व यानाः थःगु देय्यायात म्हसीके खंगुलिं गौरव महसुस यानागु खँ कनादीगु दु ।

दुबईया होटल ब्रिस्टल दुआबीइ जूगु सौन्दर्य प्रतियोगिताय् अनिला श्रेष्ठ (मिसेस युनिभर्स नेपाल–२०१९), सुधार एक (वनर सुधार भेन्चर्स), इशा पफरहा कुरैशी, हनिफ शेख, अरविन्द लिम्बावली निर्णायकय् च्वनादीगु खः ।

सौन्दर्य प्रतियोगिताय् ब्वति कयाः लिहां वःपिं सकसितं ग्रिनआर्ट मिडियाया प्रमुख कार्यकारी निर्देशक प्रविण लाकौल, प्रबन्ध निर्देशकलिसें अन्तर्राष्ट्रिय कोरियोग्राफर अनिला श्रेष्ठं वंगु शनिवाः लसकुस नापं भिंतुना बियादीगु खः ।