न्हापा डम्पिङ साइट, आः आकर्षक गन्तव्य

थिमि (नेपालभाषा टाइम्स) – मध्यपुर थिमि नगरपालिका वडा नं. ७ बोडेस्थित ऐतिहासिक कुमारि देगः लिपांगु इलय् छगू आकर्षक गन्तव्य जूगु दु। गुगु इलय् देगः परिसर व द्यःयाथाय् तक वनेगु लँय् फोहर वायेगु यानाच्वंगुलिंसुं नं अन वनेगु आँट तकं याना मच्वंगु खः ।

दँदँ न्ह्यवंनिसें डम्पिङ साइट जुयाच्वंगु, द्यःयाथाय् तक वनेगु लँपु ध्याचः जुयाः ध्वपथें जुयाच्वंगु, फोहर वायेगु थाय् नापं देगः व द्यःया संरक्षण यायेत च्वनाच्वंपिंसं हे परिसर जःखः टहरा दयेकाः खा, हँय् व बंगुर लहीगु यानाच्वंगुलिं उगु थाय् तसकं नवयाः सुं नं वनेगु आँट मयानाच्वंगु खः । लिपांगु इलय् मध्यपुर थिमि नगरपालिकाया प्रमुख मदनसुन्दर श्रेष्ठं उगु थाय्या दुर्दशा खनाः उकिया संरक्षण यायेगु ल्याखं अभियान न्ह्यायेवं उकिं सार्थकता काःगु जक मखसे आः वयाः बोडेया उगु ऐतिहासिक कुमारि देगः आकर्षक गन्तव्य जूगु दु ।

नगरपालिकां मुक्कं छगू करोड ६५ गू लाख लागतय् देगः व देगःया जःखः च्वंगु लागा सुधार याःगु खः । कुमारि मन्दिर परिसर सुधार उपभोक्ता समितिया संयोजनय् उगु लागाया सुचुकुचु यायेगुनापं संरचना निर्माण यायेगु ज्या लिपा आः उगु थाय् हराभरा जूगु दु। न्हापा उगु थासय् लहिनातःगु खा, हँय् व बंगुरलिसें वस्तीतकं मेथाय् तये यंकूगु दु ।

झण्डै १० रोपनी क्षेत्रफलय् न्यना वनाच्वंगु उगु थासय् दाछि अप्पा छ्यलाः सुरक्षाया निंतिं पःखालं ग्वया बिउगु दु। नगरपालिकां संरक्षण याःगु कुमारि द्यःयाथाय् दँय्दसं बैशाख १ गते बिस्काः जात्राया इलय् बहनी खः जात्रा यायेमाःगु व बैशाख २ गते म्ये प्वाः खनेधुंकाः द्यःयाथाय् नं वनाः परिक्रमा यायेमाः । उगु थासय् फोहर जुयाच्वंगुलिं थ्व निन्हु बाहेक मेगु इलय् सुं नं वनेगु यानामच्वंगु खः ।