‘गृहमन्त्रीया धापु आपत्तिजनक’

येँ – निर्मला पन्त प्रकरणय् गृहमन्त्रीं न्ववानादीगु खँ आपत्तिजनक जूगु धाःगु दु । बलात्कार लिपा हत्या जूम्ह निर्मला पन्तया हत्यारा ज्वनेमफुगु विषययात राजनीतिकरण याःगु धकाः गृहमन्त्री रामबहादुर थापां न्ववानादीगु खः । महिला अधिकारकर्मीतय्सं गृहमन्त्रीया थ्व धापू आपत्तिजनक जूगु खँ धाःगु दु ।

बलात्कार मानव अधिकारविरुद्ध घटना खः धासें थज्याःगु बारे न्ह्याम्हेसिनं नं विरोधया सः तयेफइ धासें सुनां नं विरोध यात धायेवं उकियात राजनीतिकरण धायेदइमखु धाःगु दु । अधिकारकर्मीतय्सं दण्डहीनताया कारणं हे बलात्कारया घटना झन झन अप्वया वनाच्वंगु खँ नं धाःगु दु ।

कञ्चनपुरया झिंस्वदँ दुम्ह मिसामचा निर्मला पन्तयात बलात्कार यानाः स्याःगु दछि थ्यंगु दु, तर वया हत्यारायात धाःसा प्रहरीं आतकं पत्ता लगे यायेफुगु मदुनि । थुकिं यानाः प्रशासनया आः नं आलोचना जुइगु जुयाच्वंगु दु । मंगलवाः मन्त्रालयया प्रगति विवरण सार्वजनिक यायेत जूगु पत्रकार सम्मेलनय् गृहमन्त्री थापां निर्मला हत्याकाण्डय् अनुसन्धान यानाच्वंपिं प्रहरीया बचाउ यासें थ्व घटनाय् राजनीतिकरण जुयाच्वंगु खँ धयादीगु खः ।

‘निर्मला पन्तया थेंज्याःगु घटना न्हापा नं जूगु दु, लिपा नं जुइ । झी गुगु समाजय् च्वना च्वनागु दु अन थज्याःगु कथंया अपराध पूवंक हे निषेध यायेफइमखु, तर थ्व घटना गुकथं राजनीतिकरण यानाच्वन व धाःसा दुःखद खः’ गृहमन्त्री थापां धाःगु खः । गृहमन्त्रीया थ्व धापूयात कयाः सामाजिक सञ्जालय् नं वय्कःया तःधंगु आलोचना जुयाच्वंगु दु । गृहमन्त्रीया धापूयात व्यंग्य यासें लेखक खगेन्द्र संग्रौलां धाःगु दु, ‘वाःया हे उत्कृष्ट सरकारी महावाणी ।’