लगं पार्कया जग स्वन

येँ- येँ महानगरपालिका वडा नं. २१ स्थित लगमय् दयेकेत्यंगु लगं पार्कया निंतिं जग स्वनेगु ज्या जुल । येँ महानगरपालिकाया प्रमुख विद्यासुन्दर शाक्यं जग स्वनेगु ज्या यानादीगु खः । मुक्कं प्यंगू करोड १३ गू लाख न्हयच्याद्वः तका लागतय् दयेकेत्यंगु पार्क दछिया दुने निर्माण सिधयेकेगु लक्ष्य काःगु दु । वइगु माघ तकया दुने सिधयेकेगु लक्ष्य कयातःगु पार्कय् फल्चा, ल्वहंहिति, अपांगमैत्री चःबि, सभा हल लगायतया सुविधा धइगु खँ धाःगु दु ।

सरकारं कोरोना भाइरसया संक्रमणप्रति सचेत जुइत व २५ म्ह स्वयां अप्वः मनू ममुनेत इनाप याःगु इनापकथं औपचारिक ज्याझ्वः मयासे विधिवत रुपं जग स्वनेगु ज्या जक याःगु खः ।उगु इलय् उगु क्षेत्रया सांसद कृष्णगोपाल श्रेष्ठ, सांसद भीमसेनदास प्रधान, येँ मनपाया उपप्रमुख हरिप्रभा खड्गी श्रेष्ठलिसें थीथी वडाया वडाअध्यक्षपिनिगु नं उपस्थिति दुगु खः ।