किपुलिइ बुंगद्यः मूर्ति लिकात

किपू (नेपालभाषा टाइम्स)- थनया गःछेँस्थित प्यंगः थामय् पलिस्था याःम्ह विवादास्पद बुंगद्यःया मूर्ति लिकायेगु ज्या जूगु दु । उगु मूर्ति अन तया तल धाःसा बुंगद्यःया स्वां व प्रसाद बीगु परम्परागत ज्या याये मखु धकाः बुंगद्यःया पानेजुपिंसं ख्याच्वः बीवं विवाद जूगु खःसा बुंगद्यःया स्वां प्रसाद बीगु चलन कायम याना तयेगु लागिं थौं मूर्ति लिकायेगु ज्या जूगु खः ।

थ्व मूर्ति थनं लिकयाः आःयात किपू नगरपालिकाया भवनय् तयाः व्यवस्थापन यायेगु खँ जूगु दु । किपुलिइ थ्व मूर्ति लिकाये दइ मखु धकाः स्थानीय सुखी गःछेँ समाजं अडान कायेवं विवाद तच्वःगु खःसा लिपा वहे त्वालय् च्वंगु गःछेँ पासा पुचः नांगु मेगु संस्थां मूर्ति लिकयाः परम्परा म्वाका तयेमाः धकाः हस्ताक्षर संकलन न्ह्याकूगु खः ।

म्हिगः मूर्ति लिकायेगु लागिं बाजं समेत वयाः ज्या याःगु खः । मूर्ति लिकायेगु ज्या किपूया थीथी वडाया अध्यक्षपिं रुपेश महर्जन, नरेश महर्जन, सुविन महर्जन, दिनेश महर्जन, हिरालाल महर्जन लिसें किपूया साहित्यकार नजर राम महर्जनपिं नं रोहवरय् च्वनादीगु खः । लिसें किपूया प्रहरी डीएसपी राजु लामा नं रोहवरय् च्वनादीगु खः ।

किपू नगरपालिका व स्थानीय मनूतय् दथुइ तःगूमछि चरणय् खँल्हाबल्हा जुइधुंकाः मूर्ति लिकायेगु धकाः सहमति जूगु खः । मूर्ति लिकायेधुंकाः मूर्तियात ह्याउँगु कापतं त्वपुनाः बाजं थानाः किपू नगरपालिकाया ज्याकुथिइ तःगु खः । बुंगद्यःया रथ थति त्वालं जावला ख्यलय् साली कुन्हु पानेजुपिं लाकां मन्ह्यासे किपुलिइ थ्वंक न्यासि वयाः याकः मिसायात बुंगद्यःया स्वां प्रसाद लःल्हाइगु परम्परा दु ।