उपभोक्ता समितिपाखें बुंगद्यःया देगः दनीगु

यल – बुंगद्यःया देगः पुनःनिर्माणया ज्या न्ह्याः वनीगु जूगु दु। भुखाय् ब्वःगु न्यादँ दयेत्यंगु इलय् नं आतक नं पुनःनिर्माणया ज्यां गति काये मफयाच्वंगु देगः पुनःनिर्माण न्ह्यःने न्ह्याकीगु जूगु दु ।

राष्ट्रिय पुनःनिर्माण प्राधिकरणं बुंगद्यःया देगः पुनःनिर्माणया निंतिं उपभोक्ता समिति गठन यायेत धासें छुं दिं न्ह्यः जक पुरातत्व विभागयात छ्वःगु पौ प्राप्त जूगु खँ सीदुगु दु। प्राधिकरणं विभागयात करिब निला न्ह्यः हे बुंगद्यःया देगः पुनःनिर्माणया निंतिं उपभोक्ता समिति गठन यायेत धासें यल महानगरपालिकायात पौ छ्वयेत याःगु इनाप पौ छुं दिं न्ह्यः जक प्राप्त जूगु खः ।

यल महानगरपालिकाया प्रमुख चिरिबाबु महर्जनं प्राधिकरणं थःपिंत च्वःगु पौ वये लिबाःगुलिं हे उपभोक्ता समिति गठन यानाः देगः पुनःनिर्माण यायेगु ज्या अन्योलय् लानाच्वंगु खँ धयादीगु दु। छुं दिं न्ह्यः जक उगु पौ थःपिंत प्राप्त जूगु धासें वय्कलं धयादिल, ‘प्राधिकरणं समिति गठन यायेत च्वःगु पौ छुं दिं न्ह्यः जक प्राप्त जूगु व पौ प्राप्त जुइवं वडा नं. २२ या वडाअध्यक्षयात सःताः बुंगद्यःया देगः पुनःनिर्माणया निंतिं उपभोक्ता समिति गठन यायेत नं धायेधुंगु दु ।’

देगः पुनःनिर्माणया न्ह्याकेत सहलह यानाः ज्या न्ह्याकेगु योजना नं तयार यानाच्वनागु वय्कलं धयादिल । देगःया गुणस्तर कायम याना तयेत पाटन दरवार संग्रहालय, प्राधिकरण, विभागया प्रतिनिधि नापं बुंगद्यःया ३२ म्ह पान्जु संघ व स्थानीयासीयात नं दुथ्याकाः सहलह यानाः निर्णय यायेगु नं वय्कलं धयादिल ।

२०७२ बैशाखय् भुखाय् ब्वयाः दुना वंगु देगः पुनःनिर्माणया निंतिं श्रीलंका सरकारं ग्वाहालि यायेगु धाःसां लिपा ठेकेदार कम्पनीलिसे कचवं जुइवं देगः दनेगु ज्या थातिं लानाच्वंगु खः । उपभोक्ता समितिमार्फत देगः दनेत पौ प्राप्त जुइवं न्यादँ लिपा देगः पुनःनिर्माणं गति काइगु जूगु दु ।

बुंगद्यःया देगः दनेत सम्पदा विभागं स्वंगू करोड लगे जुइगु अनुमान याःगु दुसा पुनःनिर्माणया ज्या न्ह्याकूगु दत्याया दुने ज्या क्वचायेकेगु लक्ष्य काःगु दु। वर्षा व सहकालया द्यःकथं कयातःम्ह बुंगद्यःया जात्रा स्वनिगःया हे दकलय् ताःहाकःगु जात्रा खः ।