आः कांग्रेसं ‘नेवाः–ताम्सालिङ’ दर्ता याइगु ?

येँ – सत्तारुढ दल नेपाल कम्युनिष्ट पार्टीं प्रदेश नं. ३ या नां ‘बागमति’ तयेगु धकाः निर्णय यायेवं आः विपक्षी पार्टी नेपाली कांग्रेसं प्रदेशया नां ‘नेवाः–ताम्सालिङ’ तयेमाः धकाः प्रस्ताव दर्ता याइगु चर्चा शुरु जूगु दु । नेकपाया पहिचान पक्षधर सांसदतय्सं नेपालमण्डल नां तयेमाः धकाः माग यानाच्वंगु दुसां पार्टीं धाःसा उकियात अस्वीकार यासें बागमति नां तयेगु निर्णय यायेधुंकूगु दु ।

अथे हे नेवाः व तामाङ पहिचान पक्षधरतय्सं प्रदेशया नां ‘नेवाः ताम्सालिङ’ तयेगु धकाः माग याना वयाच्वंगु दु। थ्व नांयात नं सत्तारुढ दल नेकपां अस्वीकार याःगुलिं आः विपक्षी नेपाली कांग्रेसं ‘नेवाःताम्सालिङ’ नांयात न्ह्यःने यंकेगु बारे वहस याःगु खँ सीदुगु दु। कांग्रेसं प्रदेशया स्थायी राजधानी हेटौंडाय् तयेगु खँयात धाःसा स्वीकार याःगु दु ।

स्थायी राजधानी व प्रदेशया नामाकरण सम्बन्धी कार्यविधि कथं आः नेपालमण्डल नांया लागिं पार्टीयाछुं नेवाः सांसदतय्सं न्हापा दर्ता यानातःगु प्रस्ताव अमान्य जूगु दु। नेवाः सांसदतय्सं न्हापा दर्ता जूगु प्रस्तावयात समेत मान्य जुइ कथं कार्यविधि संशोधन यायेत कुतः याःबलय् पार्टीं कार्यविधिया कमा व फुलस्टप तकं हिले दइ मखु धकाः निर्देशन बियाहःगु खँ सीदुगु दु। थ्व कार्यविधिइ स्थायी राजधानी व नामाकरणया सवालय् जुइगु मतदानय् सुं नं सांसद तटस्थ च्वने दइ मखु, अनिवार्य रुपं मत कुर्के हे माः धइगु बाध्यकारी नियम समेत तयातःगु खँ नं सीदुगु दु ।

संसदं कार्यविधि पारित यायेवं सत्तारुढ दलया सांसदतय्सं नामाकरण सम्बन्धी मेगु प्रस्ताव दर्ता याये मदुसां कांग्रेसं धाःसा प्रस्ताव दर्ता याये खनी । तर कांग्रेसं दर्ता याःगु प्रस्ताव पारित जुइगु सम्भावना मदु। उकिं पहिचान पक्षधरतय्गु सहानुभूति कायेगु लागिं जक जूसां कांग्रेसं ‘नेवाः–ताम्सालिङ’ नांयात क्वबीत्यंगु खँ धाःगु दु। यदि कांग्रेसं थ्व नांया प्रस्ताव दर्ता यात धाःसा थुकिं नेकपा दुनेया पहिचान पक्षधर सांसदतय्त नैतिक संकट वयेफुगु खँ सूत्रं धाःगु दु ।