ने. सं. ११४४ कौलाथ्व चौथी -

येँय् ६० सिबें अप्वः सहकारी ठगी मुद्दा

येँ – सहकारीं ठगे याःगु धासें येँ मनपाया सहकारी विभागय् खुइगू स्वयां अप्वः मुद्दा लाःगु दु । उकी मध्ये सुइन्यागू मुद्दाया फछ्र्यौट जूगु दुसा मेगुया मुद्दा नं याकनं हे फछ्र्यौट यायेगु तयारी जुयाच्वंगु खँ विभागं धाःगु दु ।

विभागया कथं गुलिखे सहकारीया सञ्चालकतय्त स्वापू तयेत तकं थाकुयाच्वंगुलिं मुद्दा थाति लानाच्वंगु दु । सरकारी मनपा दुने वयेधुंकाः आः उकियात अनलाइन प्रक्रियाय् यंकेगु ज्या जुयाच्वंगु दु ।

विभागया कथं अनलाइन प्रक्रियाय् वनेधुंकाः सहकारीइ त्यासा कयाः मपूपिनिगु विवरण वइगु जुयाः सहकारीया त्यासा नं सुरक्षित जुइ । विभागं आः छ्यलाच्वंगु सफ्ट वेयरपाखें सुनां गन गुलि त्यासा कयातःगु व पूगु दु वा मदु धकाः सी दइ । सहकारीया ध्यबा मपूपिंत बैंकय् त्यासा काःपिंत थें हे

‘ब्लाक लिस्ट’ य् तये फइगु खँ धाःगु दु । अथे जुल धाःसा सहकारीया ध्यबा मपूपिंत स्थानीय निकायं बीगु सेवा तकं रोक्का जुइगु जुयाः फँसे जुयाच्वंगु ध्यबा नं असुल जुइगु खँ विभागं धाःगु दु ।

येँ महानगरपालिकाय् थौंकन्हय् १८५६ गू सहकारी दर्ता जुयाच्वंगु दु । उगु फुक्कं सहकारीया ज्याया विवरण विभागय् वइ कथं व्यवस्था मिले यानातःगु दु । येँय् दर्ता जूगु सहकारी मध्ये १६४४ गू बचत तथा ऋण सहकारी दुसा बहुउद्देश्यीय १५६ गू दु । अथेहे उपभोक्ता, दुग्ध, कृषि, शिक्षा सञ्चार आदि सहकारीत सक्रिय जुयाच्वंगु दु । तर येँमनपाय् धाःसा ६०८ गू जक सहकारीं प्रतिवेदन बिउगु दु । मेपिंत याकनं विवरण बुझे यायेत विभागं निर्देशन बिउगु दु ।